MANILA, Philippines – Inanunsyo ng Bangsamoro Autonomous Region in Muslim Mindanao (BARMM) police nitong Sabado, Hunyo 6, ang pagkakaaresto sa hinihinalang miyembro ng Dawlah Islamiya-Hassan Group (DI-HG) na iniuugnay sa pananambang sa limang pulis sa Shariff Aguak, Maguindanao del Sur noong Marso.
Kinilala ni Brig. Gen. Christopher Abecia, director ng Police Regional Office-Bangsamoro Autonomous Region (PRO-BAR), ang suspek na si Nickson Gayak Kamangon, o kilala bilang “Nexon,” na nakalista bilang No. 1 most wanted person sa Maguindanao del Sur at No. 9 most wanted sa BARMM.
Ani Abecia, si Kamangon ay naaresto alas-9 ng umaga ng Sabado sa General Santos City International Airport habang sumasailalim sa security screening bago sumakay sa flight patungong Manila.
Ang pag-aresto ay ikinasa ng mga tauhan ng PRO-BAR, Police Regional Office 12, intelligence units, Aviation Security Unit, Army 601st Infantry Brigade, at iba pang law enforcement agencies sa General Santos City.
Ayon kay Abecia, ang operasyon ay isinagawa ng Maguindanao del Sur Police Provincial Office batay sa warrant of arrest na inisyu noong Mayo 18, 2026 ni Judge Annabelle Piang ng Regional Trial Court Branch 15 sa Shariff Aguak, Maguindanao del Sur.
Si Kamangon ay nahaharap sa kabi-kabilang kaso kabilang ang murder, frustrated murder, at robbery with violence or intimidation of persons.
Sangkot din si Kamangon sa nangyaring ambush noong Marso 28 sa Shariff Aguak na kumitil sa buhay ng limang pulis at ikinasugat ng iba pa.
“This accomplishment is clear proof of our unwavering commitment to track down and bring to justice individuals involved in criminal activities, regardless of where they may seek refuge,” ani Abecia.
Nasa kustodiya na ng pulisya ang suspek at ituturn-over sa korte para sa nararapat na legal proceedings. RNT/JGC
