MANILA, Philippines – Nagbabala ang Senate Blue Ribbon Committee na maaaring maharap sa contempt citation at arrest warrant ang 18 sinasabing “bagmen” ng dating kongresista na si Zaldy Co kung patuloy silang hindi sisipot sa imbestigasyon kaugnay ng flood control project anomalies.
Ayon kay Sen. Francis “Kiko” Pangilinan, “Let us invite these 18 individuals again to the next meeting and in the coming days.”
“At the proper time, if they continue to refuse, we can at the right time compel them to attend, subpoena them and if they refuse, we can have them cited in contempt and may be arrested when the blue ribbon committee has been fully constituted,” dagdag niya.
Sumang-ayon si Sen. Erwin Tulfo, chair ng komite, at tinawag na “insult” ang hindi pagdalo ng mga resource persons.
Sa halip na dumalo sa Blue Ribbon meeting, nagsagawa ng press conference ang mga “bagmen” sa opisina ni Sen. Robin Padilla sa ikalimang palapag ng Senado habang may pormal na pagpupulong sa session hall sa ikalawang palapag.
Sa loob ng halos tatlong oras na pagpupulong, paulit-ulit silang tinawagan ni Tulfo na bumaba at dumalo, at dalawang beses ding pinapunta ang committee staff sa opisina ni Padilla upang kumbinsihin sila.
“It would be better if they came down here so they could present what they want to say and so we could properly question them, instead of simply holding press conferences,” sabi ni Tulfo.
Natapos ang meeting nang hindi pa rin dumadalo ang 18 sinasabing witnesses.
Ang grupo ay nauna nang humarap sa hiwalay na “hearing” na pinangunahan ng mga alyado ni Sen. Alan Peter Cayetano, kung saan inulit nila ang alegasyon ng cash-filled suitcases na umano’y ibinibigay sa ilang opisyal at mambabatas, kabilang si Tulfo—na mariing itinanggi ang akusasyon.
Dahil dito, sinabi ni Tulfo na handa siyang mag-inhibit sa flood control investigation kapag nagsimula na ang pormal na pagdinig. RNT/MND
