Mariing itinanggi ng isang dating mataas na opisyal ng Department of Environment and Natural Resources (DENR) at Army reservist ang lahat ng alegasyong ibinabato laban sa kanya kaugnay ng umano’y estafa, panloloko, at iba pang iregularidad na inilabas kamakailan sa ilang ulat ng media.
Nang ireklamo ito ng ilang indibidwal na nagsasabing nakapagbigay sila ng pera para sa iba’t- ibang humanitarian projects, outreach programs, livelihood initiatives at development activities na umano’y hindi natuloy o hindi nagkaroon ng inaasahang resulta.
Sa mga panayam na lumabas sa media, inakusahan ang dating opisyal na umano’y ginamit ang kanyang dating posisyon sa gobyerno, mga koneksyon, at pagiging Army reservist upang makahikayat ng mga taong magbibigay ng pondo para sa mga proyektong inihaharap niya.
May ilan ding nag-akusa na nagkaroon umano ng mga transaksyong may kaugnayan sa isang proyekto para sa mga katutubo sa Rizal, habang ang iba naman, nagsasabing naglabas sila ng pera para sa mga programang pangkawanggawa na hindi umano naisakatuparan.
Gayunman, mariing pinabulaanan ng dating DENR official ang lahat ng mga paratang at iginiit na walang katotohanan ang mga ibinibintang laban sa kanya.
Ayon sa kanyang panig, wala pa siyang natatanggap na opisyal na kopya ng mga reklamong sinasabing isinampa laban sa kanya kaya’t hindi pa niya maaaring isa-isang sagutin ang bawat detalye ng mga alegasyon.
Aniya, mahalagang mabigyan siya ng pagkakataong makita at mapag-aralan ang mga reklamo upang maihain niya ang kanyang pormal na tugon sa tamang forum at sa pamamagitan ng kanyang mga abogado.
Iginiit din niya na handa siyang makipagtulungan sa anumang imbestigasyon na isasagawa ng mga kinauukulang ahensya ng gobyerno at naniniwala siyang malilinis ang kanyang pangalan kapag nailatag na ang lahat ng ebidensya at katotohanan.
Ayon pa sa kanyang kampo, marami sa mga alegasyong lumalabas ngayon pawang mga paratang lamang na hindi pa napatutunayan sa anumang hukuman o quasi-judicial body.
Dahil dito, pinag-aaralan na umano ng kanyang legal team ang pagsasampa ng kaukulang kasong kriminal at sibil laban sa mga indibidwal na sa tingin nila, nagpapakalat ng maling impormasyon at nakasisirang mga pahayag laban sa kanya.
Posible rin umanong magsampa ng mga reklamong may kaugnayan sa libelo, cyberlibel, at iba pang paglabag sa batas laban sa sinumang mapatutunayang nagpakalat ng mga mapanirang akusasyon nang walang sapat na batayan.
Ayon sa kanyang mga tagasuporta, hindi makatarungang husgahan agad ang dating opisyal batay lamang sa mga alegasyon na hindi pa sumasailalim sa masusing proseso ng imbestigasyon at pagdinig.
Samantala, kinumpirma ng Philippine Army na may reklamong inihain kaugnay ng umano’y paggamit ng military uniform at iba pang kaugnay na isyu. Ayon sa Army, isinailalim na ang usapin sa beripikasyon at imbestigasyon ng mga kinauukulang tanggapan upang matukoy kung may naganap na paglabag sa umiiral na mga regulasyon.
Ayon pa sa dating opisyal, walang katotohanan ang mga alegasyong ginagamit niya ang kanyang military uniform upang magbigay ng maling impresyon sa publiko. Aniya, lehitimo siyang miyembro ng Army Reserve Force at nagsilbi bilang brigade commander at battalion commander sa iba’t-ibang programa at aktibidad.
Iginiit niya na ang mga larawan at pagdalo niya sa mga opisyal na aktibidad ng militar, bahagi ng kanyang tungkulin bilang reservist at hindi upang linlangin ang sinuman.
“Paano nila masasabing ginagamit ko ang uniporme para manloko gayong lehitimo naman akong reservist at marami na akong naisagawang programa at serbisyo?” ayon sa kanyang pahayag.
Naniniwala rin ang dating opisyal na may mga taong nais lamang umanong sirain ang kanyang reputasyon dahil sa kanyang mga nagawa sa serbisyo publiko at sa mga organisasyong kanyang sinuportahan sa mga nakalipas na taon.
Ayon sa kanya, nakapagtataka umanong ngayon lamang lumabas ang mga akusasyon matapos ang kanyang matagal na pakikilahok sa iba’t-ibang humanitarian at civic activities.
Iginiit din niya na siya mismo, naging biktima ng ilang transaksyon at hindi ang nanloko, dahilan upang lalo niyang kuwestiyunin ang mga paratang na ibinabato laban sa kanya.
Dahil dito, sinabi niyang nakahanda siyang magsampa ng mga kasong kriminal at sibil laban sa mga taong sa tingin niya responsable sa pagpapakalat ng mga alegasyong aniya’y walang sapat na basehan at naglalayong sirain ang kanyang pangalan.
Sa kabila nito, wala pang inilalabas na pinal na resulta ng anumang imbestigasyon at wala pa ring desisyon mula sa korte o alinmang ahensya ng pamahalaan kaugnay ng mga paratang laban sa dating opisyal.
Dahil dito, nananatiling mga alegasyon pa lamang ang lahat ng mga akusasyon hanggang hindi ito napatutunayan sa pamamagitan ng due process at sa ilalim ng umiiral na batas ng bansa.
Samantala, umaasa ang inaakusahan na mabigyang linaw ng mga isinasagawang imbestigasyon ang mga isyung ibinabato laban sa kanya upang tuluyang matukoy kung sino ang may pananagutan at maibalik ang tiwala ng publiko sa proseso ng hustisya. RNT
