MANILA, Philippines — Binatikos ng Manila Symphony Orchestra (MSO) ang Cebu Pacific matapos umanong pigilan ang ilan sa kanilang mga miyembro na dalhin bilang hand-carry ang kanilang mga violin sa biyahe patungong Puerto Princesa para sa isang outreach workshop at pagtatanghal sa Baragatan Festival.
Ayon kay MSO Production Manager Rona De Leon, hinarang ang kanilang grupo sa boarding gate at inatasang i-check in ang mga violin case, bagay na aniya ay hindi pa nila naranasan sa mga nakaraang biyahe gamit ang Cebu Pacific at iba pang lokal at internasyonal na airline.
“Our orchestra has travelled multiple times via CebPac as well as other local and international airlines, and this has never been an issue. We were always allowed to carry them into the aircraft. This is the first time we were held up at the gates by security.”
Sa huli, sinabi ni De Leon na na-check in ang mga violin case habang pinayagan namang dalhin sa loob ng eroplano ang mismong mga instrumento. Aniya, maaaring makaapekto ang insidente sa mga susunod na biyahe ng kanilang organisasyon.
“CebPac has just lost a client. The MSO, the country’s oldest orchestra, is not gonna fly CebPac anymore,” aniya.
Sa pahayag nito, nilinaw ng Cebu Pacific na maaaring dalhin bilang hand-carry ang mga instrumentong pangmusika kung pasok ang mga ito sa itinakdang sukat na 56 sentimetro x 36 sentimetro x 23 sentimetro.
Para naman sa mga instrumentong lampas sa itinakdang sukat, maaari itong isailalim sa Special Baggage service o kaya ay bumili ng karagdagang upuan para rito.
Ayon sa airline, may ilang violin case na pasok sa size limit kaya pinayagang maipasok sa eroplano, habang ang mga lumabis sa sukat ay na-check in nang walang karagdagang bayad. Ang mismong mga biyolin ay pinayagang hand-carry ng mga pasahero.
“With regard to the recent incident, all passengers carrying violins were able to board their flights and travel as scheduled,” ayon sa Cebu Pacific.
“We understand that musical instruments are often valuable and deeply personal belongings. We encourage passengers to review baggage size requirements before traveling so we can help ensure a smooth and comfortable journey for both them and their instruments.” Dave Baluyot
