MANILA, Philippines — Isang bagong Chinese research vessel ang namataan malapit sa Bajo de Masinloc isang araw matapos kumpirmahin ng pamahalaan ang pag-alis ng isang Chinese floating research platform na matagal ding namonitor sa loob ng pinag-aagawang shoal.
Sa isinagawang maritime domain awareness flight ng Philippine Coast Guard (PCG) nitong Huwebes, namataan ang Chinese research vessel na Tong Ji na nasa layong 0.6 nautical miles mula sa Bajo de Masinloc. Kasama rin sa naobserbahan ang isang research support vessel, dalawang barko ng China Coast Guard, at tatlong Chinese maritime militia vessels.
Ayon kay PCG spokesperson for the West Philippine Sea Rear Admiral Jay Tarriela, ito ang unang pagkakataong nadokumento ng PCG ang Tong Ji na ganito kalapit sa shoal.
“I really don’t know what is the intention of the Chinese government but it is worth highlighting that it appears that the new maritime assets the Chinese are deploying in Bajo de Masinloc are pretty much using the cover of marine scientific research (MSR),” ani Tarriela.
“On the part of the Philippine government, we are not supporting such cover. It is an illegal MSR,” dagdag niya. “We have never allowed the Chinese government to deploy Chinese research vessels and conduct MSR within our exclusive economic zone (EEZ).”
Namataan din ng PCG ang ilang Chinese fishing boats, service boats, mga buoy, communications antenna, at isang floating barrier na nananatili sa loob ng lagoon ng Bajo de Masinloc.
“The floating barrier is once again put in place by the Chinese government to prevent anybody from entering the lagoon of Bajo de Masinloc,” ayon kay Tarriela.
Dumating ang bagong pagmomonitor isang araw matapos alisin ang Chinese floating platform na mahigit tatlong linggong nasa lugar.
Nauna nang sinabi ng Chinese Embassy sa Maynila na ang naturang platform ay isang pansamantalang scientific research facility ng South China Sea Institute of Oceanology sa ilalim ng Chinese Academy of Sciences at natapos na ang misyon nito.
Muling iginiit ng National Task Force for the West Philippine Sea (NTF-WPS) na nasa ilalim ng soberanya at hurisdiksyon ng Pilipinas ang Bajo de Masinloc at tanging ang pamahalaang Pilipino lamang ang may karapatang magsagawa ng mga aktibidad at magtayo ng mga istruktura sa lugar. Dave Baluyot
