ILOILO CITY, Pilipinas — Aabot sa P4.76 milyong halaga ng hinihinalang shabu ang nasamsam ng pulisya habang naaresto ang isang high-value target sa isinagawang anti-drug operation sa Barangay Calumpang, Molo district noong Lunes.
Kinilala ang suspek sa alyas na “Parcon,” 42-anyos at residente ng Barangay Calumpang. Narekober mula sa kanya ang humigit-kumulang 700 gramo ng hinihinalang shabu na nakalagay sa 11 heat-sealed plastic sachet at dalawang knot-tied plastic container.
Ayon kay Iloilo City Police Station 4 chief Capt. Ryan Christ Inot, nagsilbi umanong warehouseman ang suspek para sa magkapatid na naaresto sa hiwalay na anti-drug operation sa Barangay Buray, Oton noong Hunyo 21, kung saan nakumpiska ang halos P14 milyong halaga ng hinihinalang shabu.
“The Regional Police Drug Enforcement Unit coordinated with us after they arrested alias Choco,” ani Inot.
Batay sa impormasyon ng Police Regional Office-Western Visayas (PRO-6), sangkot umano ang suspek sa distribusyon ng ilegal na droga sa Iloilo City at mga karatig-bayan sa lalawigan.
Ayon kay PRO-6 Acting Regional Director Brig. Gen. Randulf Tuaño, bahagi ang operasyon ng pinaigting na kampanya laban sa ilegal na droga at mga sindikatong sangkot sa bentahan nito sa rehiyon.
“Every kilogram of shabu removed from the streets translates to lives protected, crimes prevented, and communities made safer. This operation demonstrates that PRO-6 will relentlessly pursue drug traffickers and dismantle the networks that continue to threaten the safety and future of our people,” ani Tuaño. Mary Anne Sapico
