MANILA, Philippines – Umaasa ang tagapagsalita ng House prosecution panel na si Kabataan Party-list Rep. Renee Co na haharap si Vice President Sara Duterte sa unang araw ng impeachment trial sa Senado sa Hulyo 6.
“Our one wish is that VP Sara doesn’t ghost the Filipino people on day one of the trial,” ani Co.
Ayon kay Co, mahalagang matapos ang impeachment trial bilang bahagi ng pananagutan sa publiko.
“Kailangan natin itong tapusin upang ipakita ang respeto sa taumbayan na naghahanap ng kasagutan,” dagdag niya.
Hiniling din niya sa mga senator-judges na maging patas at tapat sa kanilang tungkulin.
Samantala, sinabi ni House legal spokesperson Atty. Benjamin “Jay” Tolosa Jr. na ayon sa impeachment rules, maaaring humarap nang personal si Duterte o katawanin ng kanyang abogado.
“We, of course, recognize the sentiment of the public that there’s a demand to hear her… But… we have to respect the rules which allow… either appear in person or through counsel,” ani Tolosa.
Si Duterte ay nahaharap sa impeachment dahil sa umano’y maling paggamit ng P612.5 milyong confidential funds, hindi totoong SALN declarations, hindi maipaliwanag na yaman, at mga umano’y banta kina Pangulong Ferdinand Marcos Jr., First Lady Liza Araneta-Marcos, at dating House Speaker Martin Romualdez.
Samantala, sinabi rin ni Bantay Senado lawyer Dino de Leon na kung hindi dadalo si Duterte sa pagbubukas ng paglilitis, maituturing itong kawalan ng respeto sa proseso.
“Sa aming palagay, the mere fact na hindi siya a-attend is again a disrespect to the process. Respetuhin natin ang proseso, respetuhin natin ang Saligang Batas,” ani De Leon.
Dagdag niya, bagama’t si Duterte ang magpapasya kung dadalo siya o hindi, ang taumbayan ang huhusga sa Senado at sa respondent batay sa magiging takbo ng impeachment trial. RNT/MDS
