MANILA, Philippines — Opisyal nang inilunsad ng Pilipinas ang electronic visa program para sa eligible travelers mula Denmark, Faroe Islands, at Greenland, ayon sa Department of Foreign Affairs nitong Miyerkoles.
Ang foreign nationals mula sa mga nasabing lugar na planong manatili sa Pilipinas nang higit sa 30 araw ay maaari nang mag-apply ng e-Visa sa evisa.gov.ph at magbayad ng kaukulang fees sa pamamagitan ng direct bank transfer.
Nilinaw ni Foreign Affairs spokesperson Analyn Ratonel na nananatiling entitled sa 30 days visa-free entry sa Pilipinas ang Danish nationals, gayundin ang travelers mula Faroe Islands at Greenland na may hawak na Danish passports.
“Said foreign nationals who intend to stay beyond thirty (30) days, however, are required to obtain a Philippine 9(a) Temporary Visitor’s Visa prior to travel,” ani Ratonel.
Ayon sa DFA, ang Philippine e-Visa ay ibinibigay sa foreigners na magtutungo sa bansa para sa business, leisure, medical treatment, training, at pagdalo sa conferences, meetings, workshops, o seminars.
Sa ilalim ng e-Visa system, maaaring ma-access ng aplikante ang kanyang e-Visa gamit ang computers, laptops, o mobile devices, at maaari itong ipakita sa digital o printed format. Hindi na rin ididikit ang e-Visa sa passport.
Matapos ma-isyu ang e-Visa ng Philippine Embassy in Copenhagen, kailangang sagutan ng traveler ang online Philippine e-Travel registration form sa loob ng 72 oras bago ang departure.
Sinabi ni Ratonel na bahagi ang e-Visa launch para sa Denmark ng digitalization efforts ng DFA upang gawing “more efficient, secure, and accessible through an online platform” ang visa application.
Nilinaw naman ng Philippine Embassy in Denmark na hindi maaaring i-convert ang e-Visa sa ibang uri ng visa, at hindi rin extendable ang authorized period of stay.
Ang travelers na nais manatili sa Pilipinas para sa studies, employment, o iba pang non-tourism purposes, gayundin ang holders ng Danish-issued convention o alien passports, ay kailangan pa ring mag-book ng appointment sa online portal ng embahada at mag-apply ng regular visa sticker. Dave Baluyot
