CEBU CITY, Philippines — Pinaghahanda ang mga consumer sa Cebu at iba pang bahagi ng Visayas sa posibleng brownouts ngayong Huwebes ng gabi, Hulyo 9, matapos muling isailalim ng National Grid Corporation of the Philippines sa red alert ang Visayas grid dahil sa kakulangan sa suplay ng kuryente.
Sa pinakahuling advisory ng NGCP, ipatutupad ang red alert mula alas-5 ng hapon hanggang alas-7 ng gabi, habang nakataas naman ang yellow alert mula alas-3 hanggang alas-5 ng hapon at mula alas-7 hanggang alas-10 ng gabi.
Ayon sa NGCP, nasa 2,561 megawatts lamang ang available capacity kumpara sa inaasahang peak demand na 2,568 MW, dahilan upang magkaroon ng supply shortfall at maitaas ang red alert.
Ang red alert ay nangangahulugang hindi sapat ang suplay ng kuryente upang tugunan ang demand ng consumers at contingency reserve requirement ng grid. Samantala, ang yellow alert ay nagpapahiwatig ng manipis na operating margin na madaling maapektuhan ng biglaang aberya.
Tinukoy ng grid operators ang tatlong pangunahing dahilan ng kakulangan sa suplay: ang patuloy na unavailability ng Therma Visayas Inc. coal-fired units 1 at 2, ang recent forced outage ng 135-MW Panay Coal Power Corp. plant, at ang mas mataas kaysa karaniwang demand ngayong araw.
Sinabi ng NGCP na 10 planta ang nasa forced outage mula pa noong Hulyo, apat mula Hunyo, pito mula Mayo, isa mula Marso, tatlo mula 2025, tatlo mula 2024, dalawa mula 2023, at isang planta ang nananatiling offline mula pa noong 2021.
Mayroon ding 14 planta na tumatakbo sa derated capacities. Sa kabuuan, 959.3 MW ng generating capacity ang hindi available sa grid.
Ipinapakita rin ng supply crunch ang matagal nang problema sa aging at underperforming baseload capacity sa Visayas, kung saan ang matagal na pagkawala sa operasyon ng malalaking coal units ay nagtutulak sa grid operators na umasa sa mas maliliit, mas mabilis tumugon ngunit kadalasang mas mahal na planta upang punan ang kakulangan. Mary Anne Sapico
