DTI isinusulong libo-libong EV charging stations; mas matipid na biyahe para sa milyong motorcycle riders, target

MAYNILA – Isinusulong ng Department of Trade and Industry (DTI) ang pagpapalawak ng electric vehicle (EV) charging at battery-swapping stations sa buong bansa upang mabigyan ng mas matipid at mas maginhawang biyahe ang milyun-milyong Pilipinong gumagamit ng motorsiklo.

Nakipagpulong ang DTI sa mga opisyal ng Vietnamese electric vehicle manufacturer na VinFast upang talakayin ang expansion plans ng kumpanya at ang regulatory framework para sa pagtatayo ng EV charging at battery-swapping stations sa Pilipinas.

Ayon sa DTI, mahalagang mapalawak ang charging infrastructure upang mapabilis ang paggamit ng electric vehicles at suportahan ang paglipat ng mas maraming Pilipino sa mas malinis at mas matipid na uri ng transportasyon.

Target ng VinFast na magtayo ng hanggang 30,000 battery-swapping at charging stations sa iba’t ibang bahagi ng bansa. Ang mga ito ay magsisilbi sa kanilang electric motorcycle lineup na kinabibilangan ng Evo, Feliz II, at Viper.

Kasabay nito, hanggang Hulyo 18 na lamang ang pre-order para sa naturang mga electric motorcycle na compatible sa planong battery-swapping network.

Nagsisimula sa ₱64,400 ang presyo ng mga e-motorcycle, na may ₱3,000 downpayment at anim na taong warranty para sa mga mamimili.

Maaaring mag-pre-order ang mga interesadong buyer sa mga opisyal na VinFast showroom at online habang nagpapatuloy ang hakbang ng DTI at ng kumpanya upang palawakin ang EV ecosystem sa bansa. RNT