MANILA, Philippines — Handa ang Pilipinas at Association of Southeast Asian Nations (ASEAN) na tumulong sa paghahanap ng mapayapa at pangmatagalang solusyon sa sigalot sa Myanmar sa pamamagitan ng prosesong pangungunahan at pagmamay-ari mismo ng bansa, ayon kay Foreign Affairs Secretary Ma. Theresa Lazaro.
Inihayag ito ni Lazaro matapos ang serye ng diplomatic meetings sa Thailand kasama ang mga kinatawan ng Myanmar, ASEAN foreign ministers, ethnic armed organizations, at peace negotiators.
Sa isang post sa X nitong Lunes, sinabi ni Lazaro na pinangunahan niya ang informal meeting ng ASEAN foreign ministers kasama si Myanmar representative U Tin Maung Swe.
“We listened to Myanmar’s briefing and shared views on how Myanmar may advance the cessation of violence, facilitation of constructive dialogue, expansion of humanitarian assistance, and concrete cooperation to address transnational crimes in Myanmar,” ani Lazaro.
Bago ang informal ASEAN meeting, nagsagawa rin si Lazaro ng bilateral discussion kay U Tin Maung Swe sa Bangkok, na inilarawan niyang “candid exchange of views” hinggil sa ugnayan ng Pilipinas at Myanmar at pakikipag-ugnayan ng ASEAN sa bansa.
Tinalakay rin nila ang mga hakbang upang matigil ang karahasan, mapadali ang constructive dialogue, at mapalawak ang humanitarian assistance.
Nagtungo rin si Lazaro sa Chon Buri Province upang makipagpulong sa ethnic armed organizations ng Myanmar. Isinagawa ang pulong katuwang si Thai Foreign Minister Sihasak Phuangketkeow.
“I had constructive discussions with them, particularly on how ASEAN may assist in facilitating dialogue and delivering humanitarian assistance in Myanmar, with the end in view of communicating these proposals to key actors in and out of Myanmar,” aniya.
Nakipagpulong din si Lazaro sa isang kinatawan ng National Solidarity and Peacemaking Negotiation Committee upang talakayin ang direksyon ng pamahalaan sa peace process.
“On both occasions, I expressed ASEAN’s readiness to play a constructive role towards finding a peaceful and lasting solution which is Myanmar-owned and -led,” dagdag niya. Dave Baluyot
