MANILA, Philippines – Hindi pa inaksyunan ng
mga senator-judge na umuupo sa impeachment court ang hiling ng House prosecution panel na ipa-subpoena ang tax at bank records ni Vice President Sara Duterte at asawa nito, hanggang sa Lunes, Hulyo 20.
Ito ang inanunsyo ni Senate impeachment court presiding officer Francis “Chiz” Escudero matapos magdaos ng closed-door caucus ang senator-judges matapos ang mahigit isang oras sa mosyon na humihiling ng pag-iisyu ng mga subpoena.
“For the information of the parties as well as the viewing public, in caucus, the senator-judges agreed to study the matter further, given that not everyone has completed reading the memoranda submitted by the parties,” sinabi ni Escudero.
“They want more time to look into the complicated issues involved in these two motions for the issuance of subpoenas,” dagdag pa nito.
Ani Escudero, sa pagbabalik ng impeachment court sa Lunes, bibigyan ng pagkakataon ang mga senator-judge para tanungin ang prosekusyon at depensa sa mosyon.
Aniya, bibigyan ng tig-10 minuto ang bawat senator-judge para magtanong bago ang deliberasyon ng korte sa mga hiling.
Ang desisyon ay kasunod ng paghahatid ng prosekusyon at depensa ng kanilang oral arguments sa mosyon ng House panel na humihiling ng subpoena para sa tax at bank records nina Duterte at asawang si Manases Carpio.
Iginiit ng mga prosecutor na ang rekord ay kailangan upang mapatunayan ang hindi maipaliwanag na yaman ng mga Duterte, at material para sa impeachment case.
Kinontra naman ng depensa ang hiling at iginiit na ang mosyon ay kulang sa factual at legal na basehan, lumalabag sa constitutional rights sa privacy at due process ng mag-asawa, at katumbas ng fishing expedition dahil naghahanap ang prosekusyon ng ebidensya sa halip na nagpipresenta. RNT/JGC
