MANILA, Philippines — Sentro na ng pagpapatuloy ng impeachment trial ni Vice President Sara Duterte ang umano’y maling paggamit ng P612.5 milyong confidential funds ng Office of the Vice President (OVP) at Department of Education (DepEd).
Humiling noong Miyerkules ang House prosecution panel sa Senate Impeachment Court na magpalabas ng subpoena para sa unang tatlong testigo sa ilalim ng Article I ng Articles of Impeachment.
Kabilang sa mga ipapatawag sina Marivic Pareja ng Legislative Archives and Museum Management Service ng House of Representatives, Violeta Constantino, dating branch manager ng LandBank Shaw Boulevard Branch, at Nenita Camposano, dating branch manager ng LandBank DepEd Branch.
Ayon kay lead prosecutor at Batangas 2nd District Rep. Gerville “Jinky Bitrics” Luistro, inaasahang sisimulan ang presentasyon ng mga testigo para sa confidential funds sa Hulyo 22, matapos ang testimonya ni National Bureau of Investigation (NBI) Director Melvin Matibag sa Hulyo 21.
Sa ilalim ng Article I, inaakusahan si Duterte ng culpable violation of the Constitution, graft and corruption, at betrayal of public trust dahil sa umano’y maling paggamit, misappropriation, at iregular na paggastos ng confidential funds.
Ayon sa House prosecution, gumastos ang OVP at DepEd ng kabuuang P612.5 milyon sa confidential funds, kabilang ang P125 milyon na umano’y nagastos sa loob lamang ng 11 araw noong Disyembre 2022 sa OVP sa pamamagitan ng mga iregular at walang sapat na dokumentasyong disbursement, kabilang ang mga acknowledgment receipt na may umano’y kathang-isip na mga pangalan.
Sinabi ni Luistro na kumpiyansa ang prosekusyon sa lakas ng kanilang ebidensya kaugnay ng confidential funds, katulad ng kanilang naging presentasyon sa usapin ng umano’y pagbabanta ni Duterte.
Iniutos na rin ng Senate Impeachment Court sa tatlong testigo na humarap sa paglilitis at magsumite ng mga dokumentong may kaugnayan sa isyu ng confidential funds. RNT/MDS
