Parusang kamatayaan sa mandarambong, isinusulong ng VACC

Itinutulak ng Volunteers Against Crime and Corruption ang pag-iral ng parusang kamatayan sa mga kasong pandarambong.

Sinabi ni VACC President Arsenio Boy Evangelista na ito ay dahil sa maituturing na pagsabotahe sa ekonomiya ang bawat perang nanakawin sa kaban ng bayan o ibubulsa ng mga tiwaling opisyal at kawani ng gobyerno.

Aminado si Evangelista na mahirap itong matupad lalo na at tatamaan dito ang mga mambabatas at mga pulitiko pero kinakailangan na itong gawin.

Kinuwestyon rin ng lider ng VACC ang tila pagmaniobra ng ilang opisyal ng gobyerno sa isyu ng flood control scandal.

Duda si Evangelista ginagawa ito para hindi umabot sa korte ang isyu upang makaiwas sa pananagutan ang mga responsable.

Hanggang ngayon rin aniya ay bigong masagot ang tanong kung sino pa ang ibang sangkot sa isyu at sino pa ang mas mataas kay dating Congressman Zaldy Co na nagbulsa ng pondo kontra baha.

Samantala, hiniling ng VACC na maging sa magaganap na ika-limang State of the Nation Address ni Pangulong Ferdinand Marcos Jr na mabigyan pansin lalo na ang pagpapalakas sa pananagutan sa mga tiwaling opisyal.

Umaasa ng grupo na palalaksin ng gobyerno ang hakbang na ginagawa ng mag ahensya para tuluyang mapanagot ang mga sangkot sa korapsyon.

Giit ni Arsenio ‘Boy’ Evangelista ,president ng grupo na ang maanomalyang flood control projects ay siyang maituturing na pinakamalaking isyu o kaso ng pananakaw sa kaban ng bayan.

Bukod pa rito’y binigyan diin din niya ang kanilang kahilingan na ‘total ban’ ng online gambling sa Pilipinas. RNT