MANILA, Philippines – Tiniyak ng Department of Social Welfare and Development (DSWD) ang pambansang pagpapatupad ng pinansyal na tulong sa ilalim ng Unified Package for Livelihoods, Industry, Food, and Transport (UPLIFT) program para sa mahihirap, naghihikahos sa buhay, at mababang-kita na mga pamilya upang maibsan ang epekto ng tumataas na presyo ng gasolina at enerhiya na dulot ng tensyon sa Gitnang Silangan.
Nabatid na sa kanyang Ikalimang SONA o State of the Nation Address, binigyang-diin ni Pangulong Ferdinand R. Marcos Jr. ang pangako ng pamahalaan sa pagpapatupad ng mga social safety programs upang maibsan ang epekto ng global na kaguluhan sa ekonomiya sa mga bulnerableng Pilipino.
“Mula nang tumama sa ating bansa ang epekto ng giyera sa Gitnang Silangan, agad tayong nagdeklara ng State of National Energy Emergency. Isa lang ang ating misyon: UPLIFT — ang iahon ang ating nahihirapang mga mamamayan. At kaya, dala ang lahat ng aral na ito sa puso, ang ating pangunahing misyon at lahat ng ating sinasadyang pagsusumikap…sinabi sa Sona ni Pangulong Marcos.
Sinabi ng DSWD na ang UPLIFT assistance ay nagsisilbing komprehensibong hakbang sa social protection na idinisenyo upang magbigay ng agarang pinansyal na tulong sa mga mahihirap na pamilya, mga manggagawa sa transportasyon, at mga taong may mababang kita na labis na naapektuhan ng pagtaas ng presyo ng mga bilihin.
“Patuloy po ang ating pamamahagi ng UPLIFT assistance sa mga beneficiaries, lalo na po dito sa Group 2 na naka-manual payout para makuha namin yung mga digital at e-wallet accounts nila, para naman po hindi na sila pipila sa mga susunod pong payout,” ani Asst. Secretary Irene Dumlao, na siya ring tagapagsalita ng DSWD, noong Martes (Hulyo 28).
Sa ilalim ng UPLIFT assistance, inuri ng DSWD ang mga beneficiaries sa tatlong grupo, kung saan ang unang cluster ay kinabibilangan ng 3.5 milyon na kabahayan mula sa Pantawid Pamilyang Pilipino Program (4Ps) at Walang Gutom Program (WGP); 2.5 milyon na mahihirap at halos mahihirap na kabahayan na nakilala sa pamamagitan ng Community-Based Monitoring System (CBMS) ng Philippine Statistics Authority (PSA); at 1.5 milyon na mababang-kitang empleyado.
“Ngayon po, unti-unti na natin nabibigyan ang mga beneficiary households sa buong bansa, at sinisiguro natin na sa mga susunod na buwan, makakarating agad ang tulong sa pamilya nang mas mabilis,” sabi ni Asst. Secretary Dumlao.
Nabatid pa sa DSWD na sa Rehiyon ng Bikol, ang DSWD Field Office (FO) 5 – Bikol Region ay nagbigay ng Php2.35 milyon na paunang cash aid sa 1,177 na households sa Donsol, Sorsogon noong Lunes (Hulyo 27). (Santi Celario)
