MANILA, Philippines – NANAWAGAN si Pangulong Ferdinand R. Marcos Jr., araw ng Miyerkules, Hulyo 29 sa mga Pilipino na aktibong makilahok sa kampanyang “Oras Natin sa Efficiency” ng Department of Energy (DOE) at isabuhay ang mga simpleng paraan ng pagtitipid ng enerhiya upang makatulong sa pagpapalakas ng seguridad sa enerhiya ng bansa.
Sa kanyang talumpati sa pagpapasinaya ng kauna-unahang interactive Energy Museum ng bansa, hinikayat ni Pangulong Marcos ang publiko na magtipid sa paggamit ng kuryente sa pamamagitan ng pagpapatay ng mga ilaw na hindi kailangan at pagtatanggal sa saksakan ng mga kagamitang hindi ginagamit.
“Hinihikayat namin ang bawat Pilipino na makilahok sa kampanyang Oras Natin sa Efficiency. Tulungan ninyo kaming magtipid ng kuryente, patayin ang mga ilaw na hindi kailangan, at tanggalin sa saksakan ang mga kagamitang hindi ginagamit,” diin ng Pangulo.
Noong Hulyo 17, inilunsad ng DOE ang “Oras Natin sa Efficiency,” isang pambansang kampanya na nagsusulong ng sama-samang pagbabawas sa paggamit ng enerhiya tuwing Sabado, mula alas-8:00 ng gabi hanggang alas-9:00 ng gabi, o sa loob ng itinakdang isang oras, kung kailan hinihikayat ang mga kalahok na patayin ang mga ilaw na hindi kailangan at bawasan ang hindi kinakailangang paggamit ng kuryente.
Ayon kay Pangulong Marcos, ang pagpapanatili ng seguridad sa enerhiya ng bansa ay isang pananagutang dapat gampanan ng lahat. Hinimok niya ang publiko na gamitin nang wasto ang mga pinagkukunan ng enerhiya, sundin ang mga hakbang sa pagtitipid, at suportahan ang mga repormang naglalayong gawing mas maaasahan at mas napapanatili ang sektor ng enerhiya.
Binigyang-diin din ng Pangulo na nananatiling nakatuon ang pamahalaan sa pagsusulong ng episyenteng paggamit ng enerhiya. Ipinahayag niya ang pag-asang sa pamamagitan ng sama-samang pagkilos ng pamahalaan at ng mamamayan, patuloy na makapagtatayo ang Pilipinas ng isang sektor ng enerhiya na maaasahan, napapanatili, at may kakayahang tumugon sa mga mithiin ng bawat Pilipino.
“Sa ating pagpapatuloy, nawa’y magsilbing paalala ang mahalagang pagkakataong ito na ang seguridad sa enerhiya ay isang pananagutang pinagsasaluhan nating lahat. Patuloy nating gamitin nang wasto ang ating mga pinagkukunan ng enerhiya, sundin ang mga hakbang sa pagtitipid, at suportahan ang mga makabuluhang reporma,” ayon sa Pangulo.
Binigyang-diin din ng Pangulo na matapos sumiklab ang sigalot sa Gitnang Silangan noong Marso, inatasan ang lahat ng ahensya ng pamahalaan na bawasan ng 10 hanggang 20 porsiyento ang kanilang aktuwal na konsumo sa kuryente at gasolina bilang bahagi ng mga hakbang upang mapangasiwaan ang paggamit ng enerhiya at higit pang mapatatag ang kabuuang seguridad sa enerhiya ng bansa. KRIS JOSE
