MANILA, Philippines – Kapareho ng fertilizer fund scam sa administrasyon ni dating Pangulong Gloria Macapagal-Arroyo, ang impeachment case ni Vice President Sara Duterte kaugnay sa umano’y maling paggamit ng confidential funds, ayon kay House Prosecutor at Manila Rep. Joel Chua nitong Sabado, Agosto 2.
Ang fertilizer fund scam ang isa sa malalaking kontrobersiya na bumalot sa administrasyong Arroyo sangkot ang P728 milyong halaga ng pondo na para sana sa fertilizer ng mga magsasaka ngunit napunta sa mga kwestyonableng proyekto at benepisyaryo.
“If you remember the fertilizer scam, there were funds. The government’s fertilizer program was a good one. We really need a program to support our crops. But once funds are released and no one can account for where they went, it is like having ghost fertilizer,” sinabi ni Chua.
Ang Article I ng Articles of Impeachment ay nag-aakusa kay Duterte sa maling paggamit ng P612.5 milyon ng confidential funds.
Sa imbestigasyon ng Kamara, nakita ng mga mambabatas na ang Office of the Vice President ay nag-isyu ng mga acknowledgment receipt na taglay ang ilang kwestyonableng pangalan gaya ng “Mary Grace Piattos” na ayon sa Philippine Statistics Authority ay hindi nakaugnay sa sinumang rehistradong indibidwal.
Ani Chua, ang paggamit ng alyas o fictitious names sa acknowledgment receipts ay hindi nangangahulugan ng iligal na transaksyon sangkot ang confidential funds.
Ipinaliwanag niya na ang Commission on Audit ay dapat pa ring bigyan ng selyadong dokumento ng aktwal na tumanggap nito.
Ang impeachment trial ay magbabalik bukas, Agosto 3 at inaasahang magpipresenta ang prosekusyon ng dalawang state auditors ng Commission on Audit. RNT/JGC
