P73M disallowed confi fund dapat ibalik ng OVP – COA witness

MANILA, Philippines – Pinal ang kautusan ng Commission on Audit sa opisina ni Vice President Sara Duterte na ibalik ang disbursed P73 million confidential fund noong 2022 hanggat hindi nag-iisyu ang Korte Suprema ng temporary restraining order, sinabi ni state auditor at lawyer Roderick Wamil nitong Miyerkules, Agosto 5.

Ang tinutukoy ni Wamil ay ang notice of disallowance na inisyu ng COA dahil sa kulang na dokumentong ipinasa ng OVP upang patunayan kung paano ginamit ang P73 milyon ng confidential funds.

“The decision of the COA [ordering the OVP] to restitute ay hindi apektado kung mag-file [ng appeal] sa SC (Supreme Court). So kahit mag-file sila ng petition for certiorari sa SC, kailangan nilang ibalik agad [iyong P73 million] kasi ang pendency ng Petition for Certiorari, it does not stay the obligation to restitute,” ani Wamil, prosecution witness, na sagot sa tanong ni Senator-Judge Imee Marcos sa ika-13 araw ng impeachment trial ni Duterte.

Kalaunan ay nilinaw ni Senate impeachment court presiding officer Francis “Chiz” Escudero kay Wamil kung nangangahulugan ito na ang desisyon ng COA ay pinal hangga’t walang inilalabas na TRO ang Korte Suprema na sinang-ayunan ng witness.

Bilang tugon, iginiit ni Marcos na ang notice of disallowance ay nananatiling ‘appealable.’

“The case is not yet over. It can still be brought before the SC,” anang senador.

Tinanong din ni Marcos si Wamil kung sinasabi sa Notice of Suspension, na mali ang paraan ng paggamit ni Duterte sa confidential allocation ng kanyang opisina at kung ibinulsa nito ang pondo.

Sinabi naman ni Wamil na mayroong ‘presumption’ na ginamit ng Bise Presidente ang pondo para sa kanyang personal na gamit batay sa 2015-01 Joint Circular na gumagabay sa paggamit ng confidential at intelligence funds, na sinasabing “failure of the accountable officer to liquidate any public funds for which he or she is accountable, upon demand by any duly authorized officer, shall be prima facie evidence that he has put such missing funds or property to personal use and benefit.”

Kinontra naman ni Marcos ang pahayag at sinabing, “so there was no direct statement that she took it for personal use.”

“Hindi po kailangan directly sabihin kasi nagkaroon ng presumption,’ sagot ni Wamil. RNT/JGC