MANILA, Philippines – Hindi dumalo si Batangas First District Rep. Leandro Leviste sa pagharap sa National Bureau of Investigation (NBI) noong Huwebes kahit nakatanggap siya ng subpoena kaugnay ng imbestigasyon sa posibleng paglabag sa Anti-Trafficking in Persons Act.
Ayon sa NBI, nagpadala ang abogado ni Leviste ng liham na humihiling ng mga dokumento tungkol sa kaso upang makapaghanda sila. Inilipat ng NBI ang kanyang pagharap sa Martes, Agosto 11, dahil suspendido ang trabaho sa gobyerno dahil sa masamang panahon.
Nilinaw ng NBI na hindi pa respondent si Leviste at nasa fact-finding o case build-up stage pa lamang ang imbestigasyon. Layunin ng subpoena na mabigyan siya ng pagkakataong maipaliwanag ang kanyang panig bilang bahagi ng due process.
Inilipat din sa Agosto 11 ang pagharap ng dating mambabatas na si Jacinto “Jing” Paras. Pinayagan ang kanyang hiling na ipagpaliban ang pagdalo ngunit tinanggihan ang kahilingan na mabigyan ng kopya ng mga rekord ng imbestigasyon dahil kumpidensyal pa ang mga ito.
Iniimbestigahan ng NBI ang umano’y planong paninira laban kay Executive Secretary Ralph Recto. Ayon sa NBI, isang talent manager na nahuli sa kasong human trafficking ang nagsabing inutusan umano siyang mag-recruit ng mga babaeng mag-aakusa kay Recto at piliting gumamit ng ilegal na droga bilang bahagi ng umano’y plano.
Sinabi ng NBI na itinuro ng suspek si Paras bilang isa sa mga umano’y sangkot at si Leviste bilang inaasahang magpopondo sa plano. Itinanggi ni Leviste ang paratang at sinabi niyang gawa-gawa lamang ang kuwento, habang sinabi naman ng kampo ni Paras na handa itong makipagtulungan sa legal na imbestigasyon ngunit lalabanan ang mga akusasyong walang sapat na ebidensya. RNT/MDS
