MANILA, Philippines – Limang hinihinalang miyembro ng Dawlah Islamiyah-Hassan Group, kabilang ang ilang matataas na most wanted person, ang napatay habang nagsisilbi ng mga warrant of arrest ang mga awtoridad sa Pikit, Cotabato, nitong Huwebes, Agosto 6.
Kinilala ni Col. Michael John Mangahis, director ng Maguindanao del Sur Police Provincial Office, ang mga nasawi na sina Marhum Esmael, alyas “Marhom”; Halim Sansawi Usman; Ali Hassan; Rasul Tito; at Baby Ayunan Camsa.
Si Esmael, na itinuturong lider ng grupo, ang No. 1 most wanted person sa Bangsamoro Autonomous Region in Muslim Mindanao. Si Usman naman ang pangalawang most wanted sa BARMM, habang pangatlo si Hassan sa listahan ng Maguindanao del Sur.
Ayon kay Mangahis, nahaharap sina Esmael, Usman at Hassan sa maraming kaso ng murder, frustrated murder, attempted murder at robbery.
Kabilang din umano sina Usman at Hassan sa mga suspek sa pananambang sa police patrol vehicle sa Shariff Aguak, Maguindanao del Sur, noong Marso 28, na ikinasawi ng limang pulis.
Sinabi ng mga awtoridad na nagtangkang magsilbi ng mga warrant of arrest ang pinagsanib na police at military team sa Barangay Inug-ug dakong alas-2 ng hapon. Sa halip na sumuko, nagpaputok umano ang mga suspek, kaya gumanti ang mga puwersa ng pamahalaan at napatay ang limang lalaki.
Isinagawa ang operasyon ng Maguindanao del Sur Police Provincial Office sa tulong ng Army’s 601st at 602nd Infantry Brigades.
Narekober din ng mga pulis ang service firearm ni Patrolman Apollo Pagurayan, isa sa mga pulis na napatay sa pananambang sa Lambayong, Sultan Kudarat, noong Hulyo 7, 2026.
Ayon sa mga awtoridad, si Esmael, na tinukoy rin bilang sub-leader ng Dawlah Islamiyah-Hassan Group, ay umano’y explosives expert na may kaugnayan sa Bangsamoro Islamic Freedom Fighters at Panenekelan criminal gang, na iniuugnay sa mga gawaing gun-for-hire.
Sinabi ni Mangahis na sangkot umano ang grupo ni Esmael sa serye ng pananambang, harassment operations at pambobomba laban sa mga pulis, sundalo at sibilyan. RNT
