HINDI dahil nakakulong, pwede nang saktan.
Ito ang dapat malinaw sa Bureau of Jail Management and Penology matapos kumalat sa social media ang video ng insidenteng kinasangkutan ni dating congressman Mike Defensor at isang umano’y opisyal ng BJMP.
Kung mapatutunayang isang BJMP official nga ang nanakit kay Defensor, walang dahilan upang palampasin ito. Hindi dapat maging kalasag ang uniporme sa sinomang lumabag sa batas at sa dignidad ng taong nasa kanilang kustodiya.
Oo, si Defensor ay isang PDL (person deprived of liberty) at nahaharap sa mga kasong kailangang sagutin sa korte. Ngunit ang pagkakulong ay hindi lisensya para siya ay insultuhin, saktan o parusahan ng sinomang jail personnel. Ang pagpaparusa ay hindi trabaho ng jail guard. Ito ay kapangyarihan ng hukuman matapos ang due process.
Kaya dapat kumilos agad ang pamunuan ng BJMP.
Imbestigahan ninyo ang insidente. Kunin ang buong CCTV footage, pakinggan ang mga saksi at alamin ang buong pangyayari. Hindi sapat ang simpleng paliwanag o pagtatanggol sa personnel habang hindi pa malinaw ang katotohanan.
At kung mapatunayang gumamit ng hindi makatarungan o hindi kinakailangang pwersa ang isang BJMP official, patawan siya ng nararapat na parusa.
Hindi ito tungkol sa pagkampi kay Defensor. Hindi rin ito paghusga sa mga kasong kinakaharap niya. Ito ay tungkol sa isang prinsipyo: kahit ang isang taong nakakulong ay may karapatang tratuhin nang may dignidad.
Hindi dapat maging dahilan ang pagiging PDL upang mawala ang karapatang pantao. Kung ang isang detainee ay nagkasala, may proseso para siya ay hatulan at parusahan. Hindi maaaring ang jail personnel ang maging hukom at tagapagparusa.
At maging malinaw: hindi rin dapat maging kapalit ng imbestigasyon ang viral video. Kung may kontekstong hindi nakita sa video, ilabas ito. Transparency ang kailangan.
Ngunit kung mapatutunayang may pananakit, huwag nang paligoy-ligoy.
Managot ang dapat managot.
BJMP, huwag ninyong hayaang masira ang tiwala ng publiko dahil sa isang personnel na maaaring lumampas sa kanyang awtoridad.
Imbestigahan. Kung may nagkasala, disiplinahin.
Dahil ang batas ay hindi nagsasabing, “Dahil nakakulong ka, maaari ka nang saktan.”
Ang dapat nitong sabihin ay:
“Nakakulong man, tao pa rin. At ang karapatan ninoman ay hindi nawawala.”
