OCCIDENTAL MINDORO, Philippines – Idineklarang state of calamity ang bayan ng Paluan, Mindoro matapos ang ilang linggong malalakas na pag-ulan at malawakang pagbaha dulot ng Habagat.
Sa ilalim ng Resolution No. 2026-08-07, na nagkakaisang inaprubahan ng Sangguniang Bayan noong Agosto 24, pinayagan ang pagpapakilos ng mga emergency resources matapos maapektuhan ng tuloy-tuloy na sama ng panahon mula Agosto 4 hanggang 20 ang mga komunidad na umaasa sa pagsasaka at pangingisda.
Batay sa datos ng lokal na pamahalaan, umabot sa 4,399 pamilya o 19,062 indibidwal ang naapektuhan ng mga pag-ulan.
Malaki rin ang naging epekto sa kabuhayan. Aabot sa 1,541 pamilyang mangingisda ang nakaranas ng matinding pagkaantala sa kanilang kabuhayan, habang 57 magsasaka—48 lalaki at 9 babae—ang direktang naapektuhan. Tinatayang ₱1,700,350 ang kabuuang pinsala sa mga pananim, karamihan ay palay.
Ang resolusyon ay inakda ni Councilor Roche D. Bautista at inaprubahan ni Mayor Michael D. Diaz at Vice Mayor Jasmin T. Fernandez, na siyang presiding officer ng konseho.
Dahil sa deklarasyon, maaari nang gamitin ng munisipyo ang local disaster response funds para sa mga relief operation. Ipinadala rin ang kopya ng resolusyon sa GSIS upang makapag-avail ng calamity loan assistance ang mga kwalipikadong empleyado ng pamahalaan sa Paluan. RNT/MDS
