Villar itinulak pagbasura sa travel tax ng mga Pinoy

PASAY CITY — Isinusulong ni Sen. Mark Villar ang agarang pagpasa sa panukalang mag-aalis sa travel tax na sinisingil sa mga Pilipinong bumibiyahe palabas ng bansa.

Sa ilalim ng Senate Bill No. 1870 o panukalang “Travel Tax Abolition Act,” ipagbabawal sa mga ahensya ng pamahalaan at pribadong entidad ang pangongolekta ng travel tax kapag naging batas ang panukala.

“Hindi dapat maging dagdag na pasanin ang pag-alis ng bansa, lalo na para sa mga Pilipinong bumibiyahe upang magtrabaho, mag-aral, magpagamot, magnegosyo o makasama ang kanilang pamilya,” pahayag ni Villar.

Sa kasalukuyan, P1,620 ang full travel tax para sa economy-class passenger at P2,700 para sa first class. Aabot sa P6,480 ang kailangang bayaran ng pamilyang may apat na miyembrong sasakay sa economy class.

“Malaking bagay na sa isang pamilya ang P6,480. Maaari itong ilaan sa pagkain, pamasahe, tirahan, gamot o iba pang gastusin sa biyahe,” anang senador.

Nakasaad din sa panukala na dapat agad i-refund ang ibinayad na travel tax ng mga pasaherong may flight sa araw ng effectivity ng batas o pagkatapos nito.

Upang hindi maantala ang mga programang pinopondohan ng travel tax, nais ni Villar na ilaan sa taunang General Appropriations Act ang kinakailangang pondo para sa turismo, edukasyon at kultura.

Sa kasalukuyang hatian, 50% ng koleksyon ang napupunta sa Tourism Infrastructure and Enterprise Zone Authority, 40% sa Commission on Higher Education at 10% sa National Commission for Culture and the Arts.

“Patuloy nating susuportahan ang turismo, edukasyon at kultura, ngunit hindi kailangang manggaling ang pondo sa dagdag na singil sa mga Pilipinong bumibiyahe,” sinabi ni Villar.