MANILA, Philippines – Palalakasin ng Philippine National Police (PNP) ang kakayahan nito sa digital investigation upang matugis ang mga human trafficker na gumagamit ng online platforms sa pagsasamantala sa mga mahihinang sektor ng lipunan.
Iniutos ni PNP chief PGen. Jose Melencio Nartatez Jr. sa mga yunit ng pulisya sa buong bansa na paigtingin ang intelligence gathering at imbestigasyon, lalo na laban sa mga sindikatong gumagamit ng internet upang mang-recruit ng mga biktima.
Kasunod ito ng pagpapanatili ng Pilipinas sa Tier 1 ranking sa 2026 Trafficking in Persons (TIP) Report ng US Department of State sa ika-11 sunod na taon. Ang Tier 1 ang pinakamataas na antas at nangangahulugang nagsisikap ang pamahalaan na labanan ang human trafficking.
“The PNP welcomes this recognition as a testament to the sustained efforts of law enforcement, government agencies, and our partners in protecting vulnerable sectors from human trafficking,” pahayag ni Nartatez.
“While this achievement is encouraging, it also challenges us to work harder against increasingly sophisticated trafficking networks,” dagdag niya.
Gayunman, tinukoy sa ulat ang mga kakulangan sa imbestigasyon at pagsasampa ng kaso, digital forensics, at pagtukoy at pagprotekta sa mga biktimang sinasamantala sa online scam operations.
Dahil dito, iniutos ni Nartatez ang karagdagang pagsasanay para sa mga imbestigador sa cyber-enabled trafficking, kabilang ang pangangalap ng digital evidence, pagsubaybay sa cryptocurrency, at pagsusuri sa mga transaksiyong pinansyal na posibleng konektado sa mga sindikato.
Makikipag-ugnayan din ang PNP sa Inter-Agency Council Against Trafficking (IACAT) at iba pang ahensiya ng pamahalaan upang matukoy ang mga biktima at mapalakas ang mga kasong isasampa laban sa mga pinaghihinalaang trafficker.
Binigyang-diin ni Nartatez na hindi dapat maging dahilan ang pagpapanatili ng Tier 1 status upang luwagan ang pagpapatupad ng batas.
“Human trafficking thrives in silence and deception,” aniya, habang hinikayat ang publiko na ireport ang mga kahina-hinalang kaso at mag-ingat sa mga kahina-hinalang alok ng trabaho sa internet. RNT/MDS
