MANILA, Philippines — Magsasagawa ang Korte Suprema ng 2026 online Bar examinations simula Linggo, Setyembre 6, sa 15 testing centers sa buong bansa.
Aabot sa 13,441 law graduates ang rehistrado at kuwalipikadong kumuha ng tatlong araw na pagsusulit, na gaganapin din sa Setyembre 9 at 13. Pinamumunuan ang Bar Examinations Committee ni Associate Justice Samuel H. Gaerlan.
Sasaklawin ng pagsusulit ang anim na asignatura: Political and Public International Law at Commercial and Taxation Law sa Setyembre 6; Civil Law and Land Titles and Deeds at Labor Law and Social Legislation sa Setyembre 9; at Criminal Law at Remedial Law, Legal and Judicial Ethics with Practical Exercises sa Setyembre 13.
Ang mga tanong ay ibabatay lamang sa mga batas, alituntunin, issuances at jurisprudence hanggang Hunyo 30, 2025.
Itinalaga ang San Beda College Alabang bilang National Headquarters at testing center. May iba pang testing centers sa NCR, Luzon, Visayas at Mindanao.
Noong 2025, umabot sa 5,594 sa 11,425 examinees ang pumasa sa Bar examinations. Noong 2024, naman ay 3,962 sa 10,480 examinees ang pumasa sa online Bar exams.
Unang isinagawa ng Korte Suprema ang online at localized Bar examinations noong Pebrero 2022 para sa mga nagtapos ng law noong 2020 at 2021, matapos maantala ang mga pagsusulit dahil sa Covid-19 pandemic. RNT/MDS
