Poa idineklarang hostile witness; ‘abogadong walang alam’ pinatanggal sa record

MANILA, Philippines — Idineklara ng Senate impeachment court bilang hostile witness si Atty. Michael Poa, dating opisyal ng Department of Education (DepEd) at kasalukuyang miyembro ng defense team ni Vice President Sara Duterte, sa ika-21 araw ng impeachment trial nitong Miyerkoles, Setyembre 2.

Sa ruling ni impeachment court presiding officer Sen. Francis “Chiz” Escudero, pinayagan ang prosecution na gumamit ng leading questions sa pagbusisi kay Poa.

“The chair will proceed to declare Atty. Poa as a hostile witness therefore giving Atty. Tolosa the right to ask leading questions,” ani Escudero.

Nauna nang sinabi ng House prosecution na hihilingin nitong ideklarang hostile witness si Poa dahil bahagi siya ng defense panel at inaasahang magiging adversarial sa posisyon ng prosekusyon.

Isinalang si Poa kaugnay ng Article I ng impeachment case, partikular sa umano’y iregularidad sa paggamit at liquidation ng ₱112.5 milyong confidential funds ng DepEd noong pinamumunuan ito ni Duterte. Saklaw din ng nasabing article ang alegasyon hinggil sa ₱500 milyong confidential funds ng Office of the Vice President.

Uminit naman ang unang bahagi ng pagtatanong matapos ilarawan ni private prosecutor Atty. Benjamin Tolosa Jr. si Poa bilang “abogadong walang alam,” na agad inalmahan ni defense lead counsel Atty. Sheila Sison.

Ipinaliwanag ni Tolosa na hindi niya layuning insultuhin si Poa at ang kanyang pahayag ay tumutukoy sa paulit-ulit umanong pagsasabi nito sa mga naunang pagdinig sa Kamara na wala siyang personal na kaalaman sa paggamit at liquidation ng confidential funds.

“Atty. Poa, umaasa akong nauunawaan ninyong wala akong anumang intensyon na insultuhin kayo sa kahit anong paraan,” ani Tolosa, na humingi rin ng paumanhin kung nakasakit ang kanyang pahayag.

Iginiit naman ni Sison na maaari sanang gumamit ng mas magalang na termino ang prosecutor.

“Sigurado akong may iba pang mga termino sa bokabularyo ng abogado para sa ‘abogadong walang alam,’” aniya, at sinabing maaari na lamang tukuyin si Poa bilang testigong walang personal na kaalaman sa transaksyon.

Kalaunan, iniutos ni Escudero na alisin sa opisyal na record ang katagang “abogadong walang alam,” na tinawag niyang “discourteous, to say the least.”

Nagpatuloy pagkatapos nito ang pagtatanong kay Poa bilang hostile witness ng prosecution. Ernie Reyes