MANILA, Philippines — Iginiit ni detained Sen. Rodante Marcoleta na nananatili ang kanyang karapatang bumoto bilang senator-judge sa impeachment trial ni Vice President Sara Duterte dahil wala siyang preventive suspension.
Nakasaad ito sa 16-pahinang liham na ipinadala ni Marcoleta kina Senate President Sherwin Gatchalian at impeachment court presiding officer Sen. Francis Escudero noong Hulyo 20 at inilabas sa media nitong Miyerkoles.
“There is no impairment to my legal capacity to vote as a Senator-Judge for I am not under preventive suspension,” saad ni Marcoleta.
Ayon sa senador, hindi nabakante ang kanyang posisyon kahit nahaharap siya sa kasong plunder at kasalukuyang nakakulong. Iginiit din niyang hindi siya nagbitiw o idineklarang incapacitated.
Kinuwestiyon din ni Marcoleta ang pag-upo ni Escudero bilang presiding officer ng impeachment court. Para sa kanya, ang Senate President ang dapat mamuno sa paglilitis.
Muli rin niyang sinuportahan ang rekisitong 16 boto upang mahatulan si Duterte. Pinagtibay ang nasabing voting threshold nang aprubahan ang mga patakaran ng impeachment trial noong Hulyo 3.
“For the foregoing reasons, I vote in favor of the ruling on the 16-vote requirement to convict the impeached Vice-President,” ani Marcoleta.
Inaresto ang senador noong Hulyo 6 at kasalukuyang nakapiit sa Quezon City Jail kaugnay ng kasong plunder dahil sa alegasyong tumanggap siya ng P75 milyong hindi idineklarang campaign donations. Itinanggi niyang may sapat na batayan ang kaso at tinawag niya itong politically motivated. RNT
