MANILA, Philippines — Hinanapan ni dating senatorial candidate Dr. Richard Mata ng pahayag si dating Marikina 2nd District Rep. Stella Quimbo kasunod ng pagsasampa ng kasong plunder laban kay dating House Speaker Martin Romualdez.
Sa isang Facebook post, sinabi ni Mata na mahalagang marinig ang panig ni Quimbo dahil nagsilbi itong acting chairperson ng House Committee on Appropriations noong panahon ng liderato ni Romualdez.
“Stella Quimbo was the acting head of the House Committee on Appropriations under Martin’s leadership. We need her comment,” ayon kay Mata.
Nagsilbi si Quimbo bilang kinatawan ng ikalawang distrito ng Marikina mula 2019 hanggang 2025 at naging vice chairperson ng House Committee on Appropriations. Kalaunan ay naging acting chairperson siya ng komite matapos magbitiw sa puwesto si dating Ako Bicol Party-list Rep. Zaldy Co.
Nauna ring sinabi ng Office of the Ombudsman na kabilang si Quimbo sa mga dating miyembro ng House small committee na sinusuri kaugnay ng mas malawak na imbestigasyon sa pambansang badyet at flood control projects.
Kasama rin sa mga binanggit na iniimbestigahan sina dating Zamboanga City Rep. Mannix Dalipe at House Minority Leader Marcelino Libanan.
Ang naturang imbestigasyon ay hiwalay sa kasong plunder na isinampa ng Ombudsman laban kina Romualdez, Co at dalawa pang akusado kaugnay ng umano’y P7.4-bilyong kickback scheme sa flood control projects.
Wala pang pinal na finding na inilalabas ang Ombudsman na nagsasabing may pananagutang kriminal si Quimbo kaugnay ng naturang imbestigasyon.
Nauna ring lumabas sa mga ulat na may ilang infrastructure projects sa dating distrito ni Quimbo na na-award sa mga kumpanyang naiugnay sa mga kontratistang sina Sarah at Curlee Discaya.
Kabilang dito ang mga proyekto sa Rainbow Street at Zenaida Subdivision sa Barangay Concepcion Dos, gayundin ang slope protection at creek improvement works sa Balanti Creek.
Gayunman, ang pagkakaroon ng mga proyektong na-award sa naturang mga contractor sa distrito ni Quimbo ay hindi, sa sarili nito, patunay na sangkot ang dating mambabatas sa anumang ilegal na transaksyon.
Hinihintay ang pahayag ni Quimbo kaugnay ng panawagan ni Mata at sa mga usaping ibinabato sa kanya. RNT
