MANILA, Philippines — Sinabi ni Leyte Rep. at dating House Speaker Martin Romualdez na igagalang niya ang kautusan ng Sandiganbayan na ilipat siya sa Quezon City Jail, kasabay ng muling paggiit na wala siyang kasalanan sa mga paratang laban sa kanya.
“I have always said that I will face the charges against me and answer them before the proper court. That has not changed,” ani Romualdez sa isang pahayag.
“I maintain my innocence. Haharapin ko ang kaso. Sasagutin ko ang mga paratang,” dagdag niya.
Iniutos ng Sandiganbayan Third Division nitong Lunes ang paglilipat kay Romualdez mula Philippine General Hospital patungo sa New Quezon City Jail sa Payatas.
Nauna nang sinabi ng PGH na hindi na medically required ang patuloy na hospital confinement ni Romualdez matapos ang independent medical evaluation.
Pinasalamatan naman ni Romualdez ang Cardinal Santos Medical Center at PGH at sinabing patuloy niyang susundin ang payo ng kanyang mga doktor.
“This is a difficult moment for me and my family. But I will face the days ahead with dignity, with faith in God, and with confidence in the truth,” aniya.
Nahaharap si Romualdez sa kasong plunder kaugnay ng umano’y P7.4-bilyong kickbacks sa flood control at iba pang government projects.
