MANILA, Philippines – Iginiit ni Department of the Interior and Local Government (DILG) Secretary Jonvic Remulla nitong Martes na walang “drama” sa pag-aresto at pagkakakulong kay dating House Speaker at Leyte 1st District Rep. Martin Romualdez.
“Kung akala niyo over and above yung treatment na binibigay, tingnan niyo yung commitment orders at recommendations ng PGH (Philippine General Hospital). Yun lang ang sinusunod namin. Nothing more and nothing less,” ani Remulla sa press briefing sa Camp Crame.
Ayon kay Remulla, may karamdaman talaga si Romualdez at sinabi ng mga doktor ng PGH na maaari siyang ma-confine sa Bureau of Jail Management and Penology (BJMP), ngunit kailangan pa rin ng medical supervision.
Naaresto si Romualdez noong Setyembre 7 habang naka-confine sa Cardinal Santos Medical Center sa San Juan City. Limang araw matapos nito ay inilipat siya sa PGH.
Noong Lunes, sinabi ng mga doktor ng PGH sa Sandiganbayan na maaari nang ma-discharge si Romualdez. Ilang oras matapos nito, inilipat siya ng BJMP sa New Quezon City Jail sa Payatas.
Ayon sa DILG, naka-confine si Romualdez sa isang non-airconditioned infirmary ward na may tatlo pang persons deprived of liberty (PDL). May mga hospital bed at common bathroom ang naturang pasilidad.
Sinabi naman ni BJMP spokesperson Jail Superintendent Jayrex Bustinera na ang pagkakalagay kay Romualdez sa infirmary ward ay batay sa pagsusuri at rekomendasyon ng kanyang mga doktor.
Nahaharap si Romualdez sa kasong plunder kaugnay ng umano’y mahigit P7 bilyong kickback mula sa iba’t ibang proyekto ng pamahalaan mula 2022 hanggang 2025. RNT/MDS
