MANILA, Philippines – Binigyan diin ni Department of the Interior and Local Government (DILG) Secretary Jonvic Remulla na dapat ay abot-kamay ng bawat Pilipino ang serbisyong pang-emergency, kahit na sa mga pinakamalalayong komunidad ng bansa.
Sinabi ni Remulla na ang tagumpay ng Unified 911 System ay hindi lamang nakasalalay sa bilis ng pagtugon nito, kundi sa kakayahan nitong ilapit ang tulong ng pamahalaan sa mga mamamayan sa buong bansa.
Binanggit ni Remulla ang seremonya ng pagbabasbas at pagturn-over ng 20 motorsiklong pang-emergency sa Iloilo City at Aklan bilang bahagi ng mga pagsisikap ng pamahalaan na palakasin ang kakayahan ng mga lokal na emergency responder at ilapit ang tulong sa mga komunidad.
Habang dumarami ang mga Unified 911 command post na itinatayo sa buong bansa, mas madali nang natatanggap, natutukoy ang lokasyon, at naiaayos ang koordinasyon ng mga emergency call nang mas malapit sa lugar na nangangailangan ng tulong.
Pinapalakas nito ang kakayahan ng mga lokal na responder na kumilos nang mabilis at nagbibigay-daan upang magsilbing mahalagang instrumento ang hotline sa pagbibigay ng pantay na serbisyo sa mga Pilipinong humaharap sa krisis, nasa kalunsuran man o sa mga lalawigan.
KLaugnay nito sinusuportahan ang regional approach na ito ng kakayahan ng Unified 911 system na tumanggap ng tawag gamit ang iba’t ibang wika at ng geo-tagging mechanism nito; pinapadali nito para sa mga emergency responder ang pag-unawa sa mga tumatawag at pagtukoy sa kanilang lokasyon para sa mas mabilis na pagpapadala ng tulong.
Sa pamamagitan ng estratehikong pagpapalawak ng Unified 911 hotline, napabuti ng sistema ang abot nito sa mga Pilipinong nangangailangan, kung saan ang mga aktwal na pagtugon sa mismong lugar ng insidente ay nagpapakita ng epekto nito.
Sa San Fernando City, La Union, dumating ang mga emergency responder sa loob ng tatlong minuto matapos iulat ng isang tumawag sa 911 ang tungkol sa tatlong indibidwal na nakitaan ng mga sintomas ng food poisoning matapos kumain ng kabute. Dinala ang mga biktima sa pinakamalapit na ospital para sa agarang medikal na atensyon.
Sa Barangay Taculing, Bacolod City, isang matandang babae na nadulas, nagkaroon ng sugat sa ulo na may pagdurugo, at nagtamo ng bali sa buto ang agad na natulungan matapos iulat ang insidente sa pamamagitan ng 911. Agad na nagpadala ng ambulansya ng barangay upang dalhin ang biktima sa pasilidad na medikal.
Sa Butuan City, Agusan del Norte, isang tawag sa 911 na nag-uulat ng banggaan sa kalsada sa pagitan ng isang motorsiklo at kariton ng tubig ang humantong sa agarang koordinasyon sa pagitan ng City Police Office at mga patrol personnel sa lugar. Naresolba ang insidente sa loob ng tatlong minuto, na tiniyak ang mabilis na pagtulong sa nasaktang pedestrian. Para kay Remulla, ipinapakita ng mga insidenteng ito kung paano ginagawang mas mabilis, mas madaling maabot, at mas inklusibo ng 911 ang pagtugon sa mga emergency—anuman ang lokasyon o wikang gamit ng tumatawag.
Bukod sa National Call Center sa Metro Manila, mayroon na ring limang iba pang regional call center sa Cebu, Ilocos Norte, Isabela, Iloilo, at Leyte, na may mga sinanay na operator at emergency telecommunicator na marunong magsalita ng mga pangunahing wika sa kani-kanilang rehiyon. Santi Celario
