Depensa kumontro sa ‘mind conditioning’ sa SEC summary

MANILA, Philippines — Kinuwestiyon ng kampo ni Vice President Sara Duterte ang summary ng Securities and Exchange Commission (SEC) na iniharap ng House prosecution panel kaugnay ng umano’y shareholdings ng Bise Presidente sa pagpapatuloy ng impeachment trial nitong Lunes, Setyembre 21.

Iginiit ni defense counsel Atty. Justin Nicol Gular na maaaring makapanlinlang ang dokumentong may label na “Summary of VP Sara Duterte Shareholdings” dahil kasama umano rito ang authorized, subscribed at paid-up capital ng mga korporasyon at hindi lamang ang personal na shareholdings ni Duterte.

Tinawag ni Gular ang presentasyon na posibleng pagtatangka na “condition the mind of the public” hinggil sa mga halagang ipakikita sa impeachment court.

Kinontra naman ito ni private prosecutor Atty. Erwin Matib, na nagsabing may hiwalay na column sa dokumento na malinaw na tumutukoy sa aktuwal na shareholdings ng Bise Presidente.

Pinayagan ni Senate impeachment court presiding officer Francis Escudero ang prosecution na ipresenta ang dokumento ngunit ipinag-utos na alisin ang label na “Summary of VP Sara Duterte Shareholdings,” matapos kilalaning hindi lahat ng numerong nakasaad dito ay tumutukoy lamang kay Duterte.

Si SEC Company Registration and Monitoring Department Director Atty. Gerardo del Rosario ang iniharap ng prosecution upang i-authenticate ang corporate records kaugnay ng mga kumpanyang idineklara o inuugnay sa business interests ng Bise Presidente.

Bahagi ang ebidensiya ng Article II ng impeachment complaint na nag-aakusa kay Duterte ng umano’y hindi buong pagdedeklara ng kanyang assets at business interests—mga alegasyong patuloy pang dinidinig at hindi pa napagpapasyahan ng impeachment court. RNT