MANILA, Philippines – Naniniwala si Manila Rep. Joel Chua na maaaring magtalaga ang Senate Impeachment Court ng mga abogado mula sa Public Attorney’s Office (PAO) para depensahan si Vice President Sara Duterte kung tuluyang hindi dadalo ang kanyang defense panel sa impeachment trial.
Ayon kay Chua, kailangang maghain muna ng withdrawal of appearance ang mga abogado ni Duterte kung hindi sila makikilahok sa paglilitis. Matapos nito, maaaring magtalaga ng abogado ang presiding officer ng impeachment court.
“I believe that our impeachment court can assign a lawyer for the defense, through the PAO, so if the current defense panel would really refrain from participating, our presiding officer can assign a lawyer to defend the vice president,” ani Chua.
Samantala, sinabi ni prosecution counsel Benjamin Tolosa Jr. na magpapatuloy ang impeachment trial kahit hindi dumalo ang defense panel.
Ayon kay Tolosa, tungkulin ng prosecution na iharap ang ebidensya at tungkulin din ng senator-judges na dinggin at pagdesisyunan ang kaso. Maaari umanong ilatag ng prosecution ang ebidensya ex parte kung hindi makikilahok ang depensa.
Hindi naman tahasang sinabi ng defense team na tuluyan na itong aatras sa proceedings. Sa halip, sinabi ni lead counsel Sheila Sison na ang paglahok ni Duterte sa trial ay gagawin na ad cautelam, o may malinaw na reservation, matapos payagan ng Senate Impeachment Court ang mas mababang bilang ng boto na kailangan para sa conviction kapag may absent na senator-judges.
Labintatlong senator-judges ang bumoto pabor sa pagbabago ng batayan, habang isa lamang ang tumutol, si Presiding Officer at Senator-judge Francis Escudero. Anim na senator-judges mula sa minority bloc ang hindi lumahok sa botohan.
Ayon naman kay Senate President Sherwin Gatchalian, magpapatuloy ang trial hangga’t may quorum at walang inilalabas na temporary restraining order ang Supreme Court laban sa desisyon ng impeachment court.
Sa 1987 Constitution, Article XI, Section 3(5), nakasaad na kailangan ang concurrence ng two-thirds ng lahat ng miyembro ng Senado para ma-convict ang isang impeached official.
Samantala, apat na senador ang malaking bahagi ng trial ang hindi nadaluhan hanggang Huwebes—sina Jinggoy Estrada, Rodante Marcoleta, Ronald dela Rosa at Loren Legarda. RNT/MDS
