MANILA, Philippines – Inihayag ni dating Senador Antonio “Sonny” Trillanes IV na siya mismo ang humiling kay lead prosecutor at Batangas Rep. Gerville Luistro na alisin ang kanyang pangalan sa listahan ng mga testigong ihaharap ng House prosecution panel sa impeachment trial ni Vice President Sara Duterte.
Sa kanyang Facebook post nitong Huwebes, sinabi ni Trillanes na hiniling niyang bawiin ang kanyang pangalan upang maibsan ang “pressure” na nararanasan ng prosecution panel.
“Earlier in the day, I requested the House prosecution under Chair Jinky Luistro to formally withdraw my name as a witness for the prosecution. This way, the prosecution panel would be relieved from the pressure it is going through,” ani Trillanes.
Gayunman, sinabi niyang ilalahad niya sa isang press conference ang lahat ng mga bagay na dapat sana niyang iharap at ilabas sa impeachment trial.
“Having said that, I will hold a press conference tomorrow to present all the matters that I would have presented and released during the impeachment trial,” dagdag niya.
Bago mag-lunch break ang impeachment trial, kinumpirma ni Luistro sa Senate Impeachment Court na hindi na nila ihaharap si Trillanes bilang testigo para sa Article II ng Articles of Impeachment.
“The prosecution has finally decided not to present former Senator Sonny Trillanes. We seek the kind indulgence of the honorable impeachment court for the belated final decision on this particular concern,” ani Luistro.
Saklaw ng Article II ang mga alegasyon ng unexplained wealth at kabiguang ideklara ito sa Statement of Assets, Liabilities, and Net Worth (SALN) ni Duterte.
Hindi malinaw kung anong “pressure” ang tinutukoy ni Trillanes. Gayunman, ilang netizens, kabilang ang vlogger at abogado na si Jesus Falcis, ang nagsabing may mga taong tutol sa kanyang pagharap bilang testigo.
Matagal nang sinasabi ni Trillanes na may mga bank account si Duterte at ilang miyembro ng kanyang pamilya, kabilang ang kanyang ama na si dating Pangulong Rodrigo Duterte, na hindi umano idineklara sa SALN.
Noong Abril 22, iniharap si Trillanes bilang resource person sa confirmatory hearing ng House Committee on Justice kung saan naglahad siya ng ilang bank account. Kalaunan, kinumpirma ng Anti-Money Laundering Council (AMLC) na 18 sa 18 financial transactions na random na pinili mula sa kanyang mga annex ay tugma sa mga rekord ng AMLC.
Samantala, hinimok ni Senator-judge Raffy Tulfo ang prosekusyon na maging mas estratehiko sa pagpili ng mga testigo at iminungkahing mauna sanang iharap si Trillanes bago ang AMLC executive director.
Nakita rin si Trillanes sa Senado nitong Martes habang dumalo siya sa paglilitis at pinanood ang testimonya ni Davao City Mayor Sebastian Duterte. RNT/MDS
