MANILA, Philippines – Nirerespeto ng defense team ni Vice President Sara Duterte ang desisyon ng prosekusyon na alisin si dating senador Antonio Trillanes IV bilang witness sa impeachment trial.
Ayon kay Michael Poa, spokesperson ng defense team ni Duterte, wala silang pag-aalala sa desisyon ng prosekusyon na mag-alis ng kanilang mga witness.
“If they think na better for their strategy to drop a witness, whoever it may be, not specifically [former] senator Trillanes, but whoever it may be, we will continue to respect that,” ani Poa sa ika-32 araw ng impeachment trial ni Duterte.
Nilinaw ni Trillanes na siya ang humiling sa House prosecution panel na alisin ang kanyang pangalan na maging witness sa paglilitis.
Ito ay matapos ang manipestasyon ni House lead prosecutor Gerville Luistro na hindi na nila ipipresenta si Trillanes bilang witness.
Sa halip, ani Trillanes, ay magkakaroon siya ng press briefing ngayong araw, Oktubre 2.
Handa naman umano ang depensa na ipagtanggol si Duterte kahit na patuloy na tumestigo si Trillanes.
“Sa amin naman po, we were really prepared with the list of witnesses that they gave initially. So kami po, naghanda po kung sino ang naka-assign,” ani Poa.
Nagdesisyon ang Senate impeachment court na iurong ang susunod na trial session sa Lunes, Oktubre 5 sa pagpayag nito sa hiling ng defense panel na maghanda para sa direct examination ng prosekusyon kay Anti-Money Laundering Council (AMLC) Executive Director Ronel Buenaventura.
“Nagpapasalamat din po kami sa understanding ng ating presiding officer, dahil nakuha lang namin ‘yung summary this morning. Bago po kasi ‘yun. We really need to look into that. May mga detalye doon na we feel we need to look into,” sinabi ni Poa. RNT/JGC
