MANILA, Philippines – Hiniling ni senator-judge Raffy Tulfo sa Senate impeachment court nitong Lunes na admonish o paalalahanan ang tagapagsalita nito na si Atty. Reginald Tongol dahil sa paulit-ulit na pagkakamali at pangunguna sa ilang pahayag ng korte.
Binanggit ni Tulfo ang pinakabagong pahayag ni Tongol sa media na posibleng mailabas ang final verdict sa impeachment case laban kay Vice President Sara Duterte sa December 16.
“I remember, nag-issue kayo ng warning dati sa spokesman ng prosecution. In the same manner, nag-issue din kayo ng warning sa spokesman ng defense. Now, it’s about time na mag issue tayo ng warning sa sarili nating spokesperson,” sabi ni Tulfo.
“Why? Kasi over the weekend, marami akong mga kakilala, kaibigan, tumawag sa akin. Sabi, na-pre-judge niyo na agad yung outcome ng impeachment. Kasi itong si Reynald Tongol…nagsalita sa media na sa December 16, magkakaroon daw tayo ng final verdict sa impeachment trial ni VP Sara,” dagdag niya.
Tinanong din ni Tulfo si Presiding Officer Sen. Francis “Chiz” Escudero kung totoo ang sinabi ng tagapagsalita.
Sumagot si Escudero na “not entirely accurate” ang pahayag.
“So that’s fake news?” tanong ni Tulfo.
“Yes. But that statement is not entirely accurate,” sagot ni Escudero.
Paliwanag niya, maaaring base lang sa pretrial order ang mga sinabi tungkol sa timetable.
Sa nasabing order, humiling ang prosecution ng 62 trial days at ang defense ng 30 days, o kabuuang 92 trial days, na inaprubahan ng impeachment court.
“So that is just simply based on the calendar contained in the pre-trial order. But the court, at this point in time, let it be placed on record and let it be known, is based on math, not based on the realities on the ground of the trial,” sabi ni Escudero.
“It may be a working mathematical equation, but certainly not based on reality, much less that the point of view of the court. The court will instruct the spokesperson accordingly,” dagdag niya.
Dahil dito, iminungkahi ni Tulfo na dapat nang bigyan ng pormal na paalala si Tongol.
“Maybe it’s about time na para i-admonish niya, Mr presiding officer. Kasi this is not the first time. Maraming beses na siyang sumablay, pumalpak. Paulit-ulit na lang,” aniya.
“Buti pa siya, marami siyang alam. Itong mga senator- judges, mga kasamahan ko, there are things na hindi namin alam. Nabubulaga na lang kami, pag nagdak siya sa media, kumbaga inuunahan niya tayo, pini-prempt nya tayo,” anang senador.
Tiniyak naman ni Escudero kay Tulfo na kikilos ang korte kaugnay ng kanyang manifestation. Ernie Reyes
