MANILA, Philippines – Hindi sumipot si Vice President Sara Duterte sa National Bureau of Investigation (NBI) ngayong Huwebes, Oktubre 8 at sa halip ay ang legal counsel nito ang tumugon sa invitation letter na ipinadala sa kanya kaugnay sa imbestigasyon sa alegasyong cash delivery ni dismissed police officer Rodulfo Gracioso Jr.
Si Duterte ay inaasahan sanang haharap noong Lunes sa NBI ngunit sumulat ang kampo nito para humiling na ilipat ang petsa ng investigative conference at gawing Huwebes.
Dumating ang abogado ni Duterte na si Atty. Clifford Chua sa NBI headquarters sa Pasay City bandang 10:15 ng umaga.
Sa pagdating sa headquarters, kinumpirma ni Chua na magpapasa siya ng affidavit ni Duterte.
Dala rin umano niya ang mga larawan na ipinresenta ni Duterte sa press conference noong Martes. RNT/JGC
