Mga panukalang magpapalakas sa PH film industry, sinuri sa Senado

MANILA, Philippines – Tinalakay ng Senado nitong Miyerkules ang serye ng mga panukalang naglalayong palakasin, protektahan at palawakin ang industriya ng pelikula at iba pang creative sectors sa bansa.

Pinangunahan ni Sen. Robinhood Padilla ang pinagsamang pampublikong pagdinig ng Senate committees on Public Information and Mass Media, Culture and the Arts, Tourism, Ways and Means, at Finance sa Senado sa Pasay City.

Kabilang sa mga natalakay ang pagtatatag at pagpapalakas ng National Film Archive para sa pangangalaga ng mga pelikulang Pilipino at iba pang audiovisual materials na bahagi ng cultural heritage ng bansa.

Sinuri rin ang mga panukala kaugnay ng pagkakaroon ng National Film Commission, pagbibigay ng insentibo sa filmmakers at production companies, at pagpapalawak ng film tourism upang makahikayat ng local at international productions sa Pilipinas.

Kasama rin sa agenda ang pagsusulong ng animation industry at mga hakbang para mapalakas ang proteksyon at kapakanan ng mga manggagawa sa media at entertainment sector.

Layunin ng mga panukala na mapalakas hindi lamang ang produksyon ng pelikula kundi maging ang preservation ng Philippine cinema, paglikha ng trabaho, pag-akit ng investments at promosyon ng kulturang Pilipino sa loob at labas ng bansa.

Ang joint hearing ay bahagi ng deliberasyon ng Senado sa iba’t ibang panukalang may direktang epekto sa film, media, tourism at creative industries. RNT