MANILA, Philippines – Unti-unti nang dumarami ang mga bumibisita sa Manila North Cemetery (MNC) upang dalawin ang kanilang mga yumaong mahal sa buhay, dalawang araw bago ang Undas 2026.
Batay sa monitoring ng Manila Police District (MPD), nasa 4,400 na indibidwal ang nagtungo sa sementeryo nitong Oktubre 30.
Bumisita at nag-inspeksiyon din sa MNC si Manila Mayor Isko Moreno-Domagoso upang tiyakin ang kahandaan ng lungsod at muling ipaalala sa publiko ang mga patakaran sa sementeryo. Nagbabala rin siya laban sa mga “tolongges” na maaaring manamantala sa mga bibisita sa Manila North at South Cemetery.
Pinayuhan niya ang publiko na magsuot ng face mask, lalo na ang mga bata, buntis, senior citizen at may comorbidities, dahil sa pabago-bagong panahon at pagkalat ng mga sakit na tulad ng trangkaso. Hinikayat din niya ang mga tao na iwasang makipagsiksikan.
Kabilang sa mga sinuri ng alkalde ang columbarium at Online Assistance Desk na tumutulong sa mga may katanungan.
Ayon kay Moreno-Domagoso, 100 porsiyentong handa na ang MNC at pamahalaang lungsod para sa Undas 2026, katuwang ang iba’t ibang lokal at pambansang ahensya at ang MPD.
Dumating din si NCRPO Regional Director PMGen. Christopher Abrahano upang tiyakin ang kahandaan ng sementeryo sa inaasahang pagdagsa ng mga tao.
Sinabi ni Abrahano na matagal nang pinaghandaan ng pulisya ang Undas dahil taun-taon naman itong isinasagawa. Hindi lamang umano ang mga sementeryo ang binabantayan nila kundi pati ang mga lugar na dinaraanan ng mga bibisita at mga restaurant.
Umaasa siyang makapagtala ng “zero incident” ngayong Undas. Inatasan na rin umano ang mga pulis na tiyakin ang kaligtasan ng publiko.
Samantala, umaasa si Moreno-Domagoso na magiging mapayapa at maayos ang paggunita ng Undas 2026.
