Send-off ceremony sa ASEAN Summit, idinaos

MANILA, Philippines – Siniguro ng pambansang pulisya ang kanilang kahandaan sa seguridad para sa ika-49 na ASEAN Summit at mga kaugnay na pagpupulong ngayong 2026 matapos ang isinagawang send-off ceremony ngayong umaga sa Quirino Grandstand.

Ipinakita rin ng Philippine National Police (PNP) ang mga sasakyan at kagamitan na gagamitin para masiguro ang seguridad sa malaking pagtitipon ng mga lider ng ibat-ibang bansa.

Pinangunahan nina Task Group Metro Manila Commander Police Brigadier General Christopher Abrahano at ASEAN Security Task Force 2026 Commander Police Lieutenant General Neri Vincent Ignacio ang presentasyon ng mga puwersa at kagamitan.

Dumalo rin sa aktibidad sina PNP Chief Police General Jose Melencio Nartatez Jr. at Department of the Interior and Local Government Secretary Juanito Victor C. Remulla.

Lalo pang pinaigting ng National Capital Region Police Office (NCRPO) ang police visibility, intelligence monitoring at koordinasyon sa iba pang ahensya para matiyak ang seguridad ng mga delegado at publiko.

Tiniyak din ng NCRPO na magpapatuloy ang regular na serbisyo ng pulisya sa Metro Manila bago, habang at matapos ang ASEAN Summit. Jocelyn Tabangcura-Domenden