6 suspek sa Alfamart holdap sa Nueva Ecija, timbog sa Laguna

MANILA, Philippines — Arestado ang anim na suspek sa pagholdap sa isang Alfamart convenience store sa Gapan City, Nueva Ecija, matapos matunton ng pulisya sa Alaminos, Laguna, ilang oras lamang matapos ang krimen.

Ayon sa Police Regional Office 3 (PRO3), naaresto ang mga suspek dakong alas-3 ng madaling araw nitong Miyerkules, Nobyembre 11, sa pinagsanib na operasyon ng mga pulis mula Central Luzon at Calabarzon.

Batay sa imbestigasyon, limang armadong lalaki ang pumasok sa convenience store sa Barangay Pambuan dakong alas-9:30 ng gabi noong Nobyembre 10.

Nagdeklara umano ng holdap ang mga suspek at itinali ang dalawang babaeng kahera sa stockroom bago tumakas sakay ng puting Toyota HiAce van.

Tinatayang ₱43,000 cash, apat na cellphone at hindi pa matukoy na halaga ng GCash funds ang umano’y natangay sa tindahan.

Agad na nagsagawa ng pagtugis ang mga tauhan ng Regional Special Operations Group (RSOG) sa pangunguna ng PRO3, katuwang ang mga pulis sa Batangas at Laguna.

Sa pamamagitan ng tinatawag na Kuyog System, napag-ugnay ang intelligence information ng iba’t ibang yunit ng pulisya hanggang sa maharang ang sasakyan ng mga suspek.

Narekober sa operasyon ang mga baril, bala, apat na granada, cellphone, pera at van na umano’y ginamit sa pagtakas.

Sinabi ni PRO3 Regional Director Police Brig. Gen. Jess Mendez na hindi makakaiwas sa pag-aresto ang mga kriminal sa simpleng pagtawid sa hangganan ng mga lalawigan o rehiyon.

Iniimbestigahan din ng mga awtoridad ang posibleng pagkakasangkot ng grupo sa iba pang holdapan sa mga convenience store.

Nananatili sa kustodiya ng pulisya ang anim na suspek habang inihahanda ang mga kaukulang reklamong robbery laban sa kanila. RNT