Home TOP STORIES Rubio, walang nakikitang agarang banta ng dirty bomb attack sa Washington

Rubio, walang nakikitang agarang banta ng dirty bomb attack sa Washington

3
0

MANILA, Philippines – Hindi nakikita ni US Secretary of State Marco Rubio ang anumang agarang banta sa Washington matapos maiulat na posibleng nagpaplano ang Iran ng pag-atake gamit ang tinatawag na dirty bomb sa kabisera ng Estados Unidos.

Tinanong si Rubio nitong Miyerkules sa Maynila tungkol sa ulat ng CNN na nakabatay umano sa mga pagtatasa ng US intelligence.

“I am not,” sagot ni Rubio nang tanungin kung nababahala siya sa posibleng agarang pag-atake sa Washington. “I don’t think there is any imminent threat.”

Gayunman, sinabi niyang patuloy na binabantayan ng pamahalaan ng US ang anumang maaaring magbanta sa kaligtasan at seguridad ng bansa.

Nauna nang sinabi ni US President Donald Trump nitong Martes na seryosong tinitingnan ng Estados Unidos ang posibilidad na nagpaplano ang Iran ng naturang pag-atake.

“We’re looking into it,” pahayag ni Trump nang tanungin ng mga mamamahayag sa Maynila.

Sinabi rin niya na kung may nagbabantang pag-atake, mananagot ang sinumang nasa likod nito. Umaasa naman siyang hindi ito mangyayari, ngunit seryoso umanong tinatrato ng US ang ulat.

Iniulat ng CNN nitong Lunes, batay sa mga source nito, na may impormasyon ang US intelligence tungkol sa posibleng plano ng Tehran na magpasabog ng dirty bomb sa Washington.

Ang dirty bomb ay gumagamit ng karaniwang pampasabog upang ikalat ang radioactive material. Hindi ito nagdudulot ng nuclear explosion gaya ng nuclear weapon, ngunit maaari itong magkalat ng radioactive contamination at magdulot ng malaking kaguluhan at pangamba sa publiko.

Itinanggi naman ng Iranian foreign ministry ang mga alegasyon nitong Martes at tinawag ang mga ito na “baseless.”

Nagpalitan pa rin ng putok ang US at Iran nitong Martes sa kabila ng pakikipag-usap ng Iran sa mga tagapamagitan mula Oman at Qatar.

Nagsimula ang digmaan noong Pebrero 28 nang salakayin ng US at Israel ang Iran, na gumanti naman sa pamamagitan ng mga pag-atake sa Israel at mga bansa sa Gulf na nagho-host ng mga base militar ng Amerika.

Libo-libo na ang nasawi at milyon-milyon ang nawalan ng tirahan dahil sa mga pag-atake ng US at Israel sa Iran at ng Israel sa Lebanon. RNT/MDS

LEAVE A REPLY

Please enter your comment!
Please enter your name here