Abot-kayang pabahay tatrabahuin para sa informal settlers

MANILA, Philippines – NILALAYON ng FPJ Panday Bayanihan partylist na magbigay ng abot-kayang pabahay na may kabuhayan at sapat na serbisyo sa mga lugar ng relokasyon para sa mga pamilyang nakatira sa informal settler zones.

Ayon kay Brian Poe Llamanzares, sinusuportahan nila ang Community Mortgage Program ng pamahalaan na naglalayong magbigay ng abot-kayang pautang sa mga mahihirap na pamilya upang makamit nila ang kanilang pangarap na magkaroon ng sariling tahanan.

Sa kasalukuyan, tinatayang nasa 3.7 milyong informal settler families (ISFs) ang nasa bansa, kung saan kalahating milyon sa kanila ay nakatira sa mga slum at delikadong lugar sa Metro Manila.

Aminado si Poe na bagaman may Community Mortgage Program, ang mga gastos sa pag-develop ng lupa at pabahay ay nananatiling malaking hamon para sa mga pamilyang may mababang kita.

Marami sa mga na-relocate ay nag-aalala sa kawalan ng access sa mga serbisyong panlipunan tulad ng kalusugan, edukasyon, at kapayapaan.

Hinimok ni Poe ang mga ahensiya ng gobyerno na maglaan ng mga programa sa kabuhayan na pamamahalaan ng mga organisasyong urban poor para makapagbigay ng karagdagang kita para sa mga na-relocate.

Dahil sa kakulangan ng sapat na trabaho sa mga relokasyon, may mga pamilya na bumabalik sa kanilang dating tirahan o nahihirapan dahil sa gastos at layo sa kanilang dating trabaho.

Para maiwasan ang mga ganitong suliranin, iminungkahi ni Poe na magtulungan ang lokal na pamahalaan na pinagmulan at pinagtutuuan ng mga informal settlers upang mapataas ang kita at mailaan sa kanila ang tamang kabuhayan. Sa ganitong paraan, magiging matatag ang kanilang pamumuhay at makatutulong sa pag-unlad ng ekonomiya sa bagong lugar ng relokasyon.

Ipinunto pa ni Poe na ang relocation site ay dapat magkaroon ng disenteng kalagayan, hindi tulad ng pinagmulan, upang ang bawat relokasyon ay magdulot ng mas maayos na pamumuhay sa bawat pamilyang na-relocate.

Mas mainam ang pagkakaroon ng partisipasyon ng mga informal settlers sa anumang hakbangin na housing program ng Pambansa o lokal na pamahalaan upang sa paglilipat ng mga ISF ay walang pangamba sa ikabubuhay, may serbisyong panlipunan at ligtas ang lugar na kanilang paglilipatan anumang sakuna gaya ng pagbaha o pagguho ng lupa, saad pa ni Poe. RNT