MANILA, Philippines- Sa ikalawang pagkakataon ay hindi dadalo si suspended Bamban Mayor Alice Guo sa pagpapatuloy ng imbestigasyon ng Senado sa sinalakay na POGO sa kanyang bayan, ayon sa abogado nitong si Stephen David.
“[D]i siya maka-attend tomorrow sa Senate hearing. Traumatized siya sa Senate treatment sa kanya plus emotionally and physically drained siya sa dami ng accusations sa kanya,” mensahe ni David nitong Martes.
Nagpadala rin si Guo letter of explanation kay Senator Risa Hontiveros nitong Martes, kung saan sinabi niyang ang kanyang pisikal at mental na kondisyon “has not improved and even worsened.”
“All these significant challenges had taken a toll on my mental and physical health making me unfit to endure a rigorous situation such as a [S]enate hearing. Not to mention, I have been constantly receiving death threats that I cannot simply ignore as I am afraid that these threats may endanger my life,” saad sa liham ni Guo.
Ipinahiwatig na ng abogado ni Guo nitong Lunes na hindi ulit ito dadalo sa pagdinig matapos ma-“traumatize” sa Senate investigation.
Nauna namang inihayag ni Senate President Francis “Chiz” Escudero na lalagdaan ang warrant of arrest laban kay Guo kung magkakaroon ng pormal na mosyon mula sa Senate committee on women, children, family relations, and gender equality. RNT/SA
