MANILA, Philippines – Nakatakdang tumestigo si Buenaventura sa Lunes kaugnay ng AMLC records sa financial transactions nina Sara Duterte at kanyang asawang si Atty. Manases Carpio, kabilang ang bank transactions at iba pang financial dealings sa mga nagdaang taon.
Ayon kay Sison, kailangan ng depensa ng sapat na oras upang mapag-aralan ang 24 kahon ng mga dokumento na may kasamang 11-pahinang summary.
Ipinagpaliban ng impeachment court hanggang Lunes ang testimonya ni Buenaventura. Magpapatuloy ang paglilitis alas-10 ng umaga.
Ipinaliwanag ni House prosecutor Akbayan Party-list Rep. Chel Diokno na hindi hadlang ang confidentiality rules ng Anti-Money Laundering Council (AMLC) sa subpoena na inilabas ng Senate impeachment court.
Iginiit ito ni Diokno matapos hilingin ng defense team ni Vice President Sara Duterte na ipagpaliban ang testimonya ng AMLC official upang mapag-aralan muna ang mga dokumento at usapin sa confidentiality.
Ayon kay Diokno, ipinagbabawal ng Section 8-A ng Anti-Money Laundering Act ang hindi awtorisadong pagbubunyag ng AMLC information, ngunit hindi nito hinaharangan ang lawful subpoena mula sa korte.
“Section 8-A was only intended to prevent leaks by officers or employees of the [AMLC]. It was never intended as a blanket shield for any lawful subpoenas issued by a proper court,” ani Diokno.
Ginamit naman ni defense counsel Sheila Sison ang parehong probisyon matapos niyang banggitin na ang mga dokumentong isinumite ni AMLC Executive Director Ronel Buenaventura ay may tatak na “strictly confidential.” RNT/MDS/Meliza Maluntag
