MANILA, Philippines – Ayon sa Anti-Money Laundering Council (AMLC) nitong Huwebes na P5.2 bilyon na halaga ng mga ari-arian ang na-freeze matapos makuha ang ikaanim na freeze order mula sa Court of Appeals kaugnay sa isinasagawang imbestigasyon sa maanomalyang flood control projects.
Ang freeze order ay sumasaklaw sa 39 bank account, apat na insurance policy, at 59 real estate property.
Nauna nang sinabi ng AMLC na mula nang ilabas ang unang freeze order noong Setyembre 16, ang ahensya ay nakapag-freeze na ng 1,671 bank accounts, 58 insurance policy, 163 motor vehicles, 99 real properties, at 12 e-wallet accounts na pinaniniwalaang konektado sa mga iregularidad sa flood control works.
Sinabi ni David na bagama’t hindi niya maaaring ibunyag ang mga indibidwal na ang mga ari-arian ay nafreeze, sinabi niya na kasama dito ang “mga dating opisyal ng DPWH, mga kontratista, at kanilang mga kasamahan kaugnay sa katiwalian ng mga proyekto sa pagkontrol sa baha.”
Samantala, nang tanungin kung ang AMLC ay may naobserbahang aktibidad ng money laundering bago ang pagpapalabas ng mga freeze order, sinabi ni David na pinahintulutan ng CA ang AMLC na magsagawa ng bank inquiry sa mga account na ito.
Binanggit ni David na pagkatapos ng bank inquiry, na aniya ay magtatagal, magsusumite ang mga bank investigator ng ulat sa mga aktibidad ng mga may hawak ng bank account, lalo na kung nag-withdraw sila ng napakalaking halaga ng pera matapos ipag-utos ni Pangulong Ferdinand Marcos Jr. ang imbestigasyon sa katiwalian sa mga proyektong imprastraktura ng gobyerno. RNT/MND
