MANILA, Philippines- Ipinawalang-bisa ang pagkakatalaga ng 804 tauhan ng Bureau of Corrections (BuCor) dahil sa kakulangan ng eligibility.
Subalit, tiniyak ni BuCor Director General Gregorio Pio P. Catapang Jr. na ikinakasa niya ang directorate office para sa edukasyon at pagsasanay upang matugunan ang problema sa eligibility ng mga tauhan ng bureau.
Sinabi ni Catapang sa mga apektadong tauhan na “the bureau is creating a program to address their required schooling for their career advancement.”
Samantala, pinangasiwaan ni Catapang nitong Huwenes ang panunumpa ni newly promoted Correctional Technical Superintendent Marjorie Ann Santidad, apat na bagong promote na non-uniformed personnel, at pitong bagong non-uniformed personnel.
“Marami pa tayong ipupromote at open pa tayo to hire new personnel, so do your job and do it well until you get promoted,” aniya sa oath taking ceremony.
“We need to work faster at least 10 times than the government procedure to get things done,” dagdag niya.
Sa bisa ng Republic Act No. 10575, ang BuCor Act of 2013, ginawang uniformed organization ang bureau kung saan rekisitos sa mga opisyal nito at mga tauhan na makaabot sa partikular na kwalipikasyon.
Nagresulta ang mga probisyon ng batas sa pagkakabasura ng 233 tauhan na nagtapos ang serbisyo noong Marso 16 sa pagpalyang makatalima sa eligibility requirements. RNT/SA
