MANILA, Philippines – Kinatigan ng Kamara ang mosyon na inihain ni Manila Rep Rolando Valeriano na humihiling na magkaroon ng bagong imbestigasyon sa inaasal ni suspended Rep. Francisco “Kiko” Barzaga kung saan kasama sa naging hiling ay mapatawan ng mas mabigat na parusa ang mambabatas.
Kasabay ng pagkatig ng Kamara, nagmosyon si House Deputy Majority Leader Rodge Gutierrez na atasan ang House Ethics Committee na aksyunan ang naging privilege speech ni Valeriano.
“Mr. Speaker, I move to authorize the committee on ethics and privileges to conduct a thorough assessment on the conduct of the respondent member Mr. Francisco Barzaga during the period of his suspension. Second, to require the respondent member, Mr. Barzaga, to appear in the hearing of the committee; and third, to immediately report to the House its findings and recommendations after the scheduled hearing,” pahayag ni Gutierrez.
Sa kanyang privilege speech sinabi ni Valeriano, chairman ng House Committee on Public Order and Safety, na sa kasama sa ipinataw na suspension order laban kay Barzaga ay hindi na nito uulitin ang kanyang maling inasal, subalit hindi umano ito nasunod.
Ani Valeriano, mayroong pa ring mga social media posts si Barzaga na malinaw na paglabag sa Section 141 ng Rules ng Kamara.
“He (Barzaga) violates ‘yung kanyang suspension, so I move, Mr. Speaker, na sa susunod na committee hearing ng ethics siya po ay mapatawan muli ng another suspension without allowance and salaries,” pahayag ni Valeriano sa naging sesyon kahapon.
“Discipline without enforcement renders our authority meaningless. The continuing defiance of Congressman Barzaga must be addressed immediately,” giit pa nito.
Tinukoy ni Valeriano ang kontrobersiyal na posts ni Barzaga patukoy sa alegasyon nito na tumanggap ng bribe ang mga mambabatas mula kay business tycoon Enrique Razon kapalit ng suporta sa liderato ni dating House Speaker Martin Romualdez gayundin ang post nito sa pagkamatay ni Antipolo Rep Romeo Acop. Gail Mendoza
