MALACAÑANG — Nagkasundo ang Pilipinas at Japan na simulan ang negosasyon para sa Acquisition and Cross-Servicing Agreement (ACSA) na magpapahintulot sa pagpapalitan ng logistical support bilang bahagi ng kanilang layuning palalimin ang security at defense cooperation.
Inanunsyo ito nina Pangulong Ferdinand R. Marcos Jr. at Japan Prime Minister Ishiba Shigeru kasunod ng kanilang bilateral meeting sa Malacañang. Si Ishiba ay nasa Pilipinas para sa kanyang dalawang araw na official visit.
Sa pahayag ni Pangulong Marcos, sinabi niyang, “Japan has been of great assistance in helping us achieve our aspiration for peace and friendship with all nations with strength and integrity. Further, we have agreed to start negotiations on an Acquisition and Cross-Servicing Agreement.”
Kinumpirma naman ito ni Prime Minister Ishiba at idinagdag, “As we see the deepening of our bilateral cooperation in a multilayered way in recent years, we agreed to start the negotiation through ACSA.”
Pinalawig pa ni Ishiba ang kanilang usapan, “We also confirmed to start the government-to-government discussion on potential conclusion of a security of information agreement in the future.”
Ang ACSA ay isang bilateral defense pact na magbibigay-daan sa mga armed forces ng Pilipinas at Japan na magpalitan ng logistical support, kabilang ang fuel, pagkain, transportasyon, medical services, at spare parts sa mga joint exercises, training, peacekeeping missions, at humanitarian operations.
Mayroon ding katulad na kasunduan ang Japan sa mga kaalyado nito tulad ng Estados Unidos at Australia, na naglalayong mapabuti ang interoperability at operational coordination sa mga regional at global security engagements.
Sa parehong pagpupulong, inihayag na rin ang Reciprocal Access Agreement, isang kasunduan na magbibigay-daan sa mga joint military exercises at mga pagbisita ng tropang Pilipino at Hapones sa isa’t isa. Ayon sa mga kasunduan, ang mga kasunduan ay dumaan pa sa pagsusuri ng mga Kongreso ng Maynila at Tokyo bago maging ganap na tratado, na kahalintulad ng mga kasunduan tulad ng Visiting Forces Agreement sa pagitan ng Pilipinas at Amerika, at ang Status of Visiting Forces Agreement sa pagitan ng Pilipinas at Australia.
Idinagdag ni Pangulong Marcos, “On defense and security cooperation, it is of note that the Philippines is the first recipient of Japan’s Official Security Assistance (OSA).” Binanggit niya ang kamakailan lamang na inilunsad na aid mechanism ng Japan upang mapabuti ang regional security capacities ng Pilipinas.
“Nakapagbigay ang OSA ng mga makabuluhang pag-upgrade sa ating mga security agencies, lalung-lalo na ang Department of National Defense,” wika ni Pangulong Marcos.
Bilang pagtatapos, binigyan ng Pangulo ng diin ang kanilang patuloy na layunin, “I look forward to continuing our strengthened strategic partnership with Japan, a country that shares our ideals and aspirations of upholding democratic institutions and a rules-based international order.” Kris Jose
