SOBRA-SOBRA na ang tubig sa mahal kong Pinas.
At napakarami nang kasiraan at panganib na dala nito.
Kahit saan, may baha at dahil sa tubig-baha nagiging marupok na ang mga lupa kahit saan.
Naririyan ang mga bahay na nilalamong ng mga ilog .
May mga natitibag na lupa at isinasama ang mga bahay na nakatayo sa mga ito na tibag na rin.
Panay rin ang pagkatibag ng mga kalsada at tulay, substandard o kinorap man o matibay ang mga ito.
Nalulunod o naaanod ang mga alagang hayop at tanim at nawawalan ikabubuhay ang mga nag-aalaga at nagtatanim sa mga ito.
Sa mga kalunsuran lalo na, may sumusulpot na mga sakit gaya ng leptospirosis, hadhad, alipunga at iba pa.
Dahil sa mga baha, nasisira rin ng pagpasok ng mga mag-aaral sa mga eskwela at pagpasok sa trabaho ng mga obrero sa pribado at pampublikong sektor.
Nasisira rin ang mga pinagkakakitaan sa turismo.
Ang mga motorista, sa sobrang trapik, kung hindi man sila magkandalugi-lugi sa produktong petrolyo, nasisiraan o naaksidente sila.
Ang mga negosyante? Nalulugi sa trapik at pagkabalam ng mga delivery ng mga produkto at serbisyo.
Ang pinakamatindi, may mga nalulunod, naoospital sa mga sakit na tumatama sa kanila.
Ganyan katindi ang tubig, ang sobrang tubig ngayong tag-ulan.
Nagbubunga ito ng mga kahirapan, sakit at kamatayan.
PAG-ISIPAN ANG PROBLEMA
Madaling maintindihan ang problema kung isipin nating nagaganap ang mga ito dahil tag-ulan.
Panahon ngayon ng mga bagyo, pag-ulan at habagat na laging may dalang ulan na pagkabuhos, nagiging mga baha.
Heto ang isang ikinakakaba ng marami.
Kapag may baha, sinasabi ng mga sapin-saping dekada nang nakatira sa isang lugar ang “Ngayon ang nangyayari ang mga pagbaha sa amin. At grabe pa!”
Ano-ano na nga ba ang mga nagaganap sa mga lugar o sa maraming lugar sa Pinas na mismong ang mga senior citizen ang nagugulat at natatakot sa nagaganap na mga paglaganap ng tubig at baha kahit sa mga lugar na kinagisnan na nilang hindi tinatamaan ng pagtutubig at baha?
MGA UGAT, ANO-ANO NGA BA?
Dahil nagbabago na ang kapaligiran dahil umano sa polusyon, naririyan na ang sobrang pag-iinit o kaya’y pagkakaroon ng maulan at mabagyong panahon.
Sinisira naman umano ng mga land developer para sa proyektong housing, komersyal at industriyal ang mga magugubat na lugar kaya wala nang punong sisipsip sa mga tubig-ulan at tubig-baha.
Para naman sa iba, wala sa ayos ang mga plano ng lahat ng mga proyektong panlupa sa mga kalunsuran man o kanayunan at binabalewala ang epekto nito sa kalikasan at kapaligiran.
May nagsasabi namang ang mga korap o tiwali sa pamahalaan ang malaking dahilan dahil ibinubulsa nila ang mga pondong dapat para sa flood control projects.
Ang mga solusyon, nasaan?
